Aleksa Yankoviç: “Sumqayıt”ın hədəfi avrokuboklara yollanmaqdır”

“Sumqayıt”ın yarımmüdafiəçisi Aleksa Yankoviçin Futbolxeber.az saytına müsahibəsi

- Ölkə kubokunun 1/8 finalında I Liqa təmsilçisi “Difai”ni 3:1 hesabı ilə məğlub edərək mərhələ adladınız. Oyunla bağlı nə deyə bilərsiniz?

- Bu, bizim üçün vacib qələbədir. Növbəti mərhələyə adladıq. Komandamızı təbrik edirəm. Eləcə də daim yanımızda olan azarkeşlərimizə minnətdaram. Şadam ki, onları sevindirdik. Növbəti matçlarda da uğurlu çıxışımızı davam etdirməyə çalışacağıq.

- 1/4 finaldakı rəqibiniz “Zirə”dir. Şansları necə dəyərləndirirsiniz?

- “Zirə”yə qarşı oynamışıq. Çox yaxşı komandadılar. Səhv etmirəmsə, son 2 ildə ölkə çempionatında gümüş medal qazanıblar. Odur ki, bizi çox maraqlı və gərgin iki oyun gözləyir.

­- Çempionatda 4 gün sonra “İmişli” ilə üz-üzə gələcəksiniz. Həmin matçdan gözləntiləriniz nədir?

- “İmişli” ilə ilk dövrədəki matçımız maraqlı alınmışdı. Yaxşı oynasaq da, yekunda uduzmuşduq. Lakin sonradan texniki qələbə qazandıq. Bu dəfə də meydana qələbə üçün çıxacağıq. Turnir cədvəlindəki mövqeyimizi daha da yaxşılaşdırmaq üçün qələbə bizə çox lazımdır.

- Baş məşqçiniz Saşa İliç 4 oyunluq cəzalandı. Sizcə, bu qərar nə dərəcədə ədalətlidir?

- Üzrlü sayın, lakin mən bu barədə danışmaq istəmirəm.

- 13 turdan sonra çempionatda 23 xalla beşincisiniz. İkinci yerdən “Sumqayıt”ı cəmi 3 xal ayırır. Avrokuboklar şanslarını necə qiymətləndirirsiniz?

- Açığı, hazırda mövsümün sonu barədə düşünmürük. Çünki qarşıda hələ 20 tur var. Bəli, hədəfimiz avrokuboklara yollanmaqdır. Çox istərdik ki, ilk üçlüyə düşək və Konfrans Liqasına vəsiqə qazanaq.  

- Sizcə, “Sumqayıt”ın avrokuboklara yollanmaq ehtimalı kubokdan daha çoxdur, yoxsa çempionatdan?

- Biz addım-addım gedirik. Mümkün olsa, kuboku da qazanmaq istərdik. Titul qazanmağı kim istəməz ki? Sadəcə indi irəli getmək lazım deyil. Məqsədimiz hər qarşıdakı matça köklənmək və nəticə qazanmaqdır.