Söyəni bildik, bəs söydürənlərə hansı cəza düşür?

AFFA İntizam Komitəsi “Neftçi”nin baş məşqçisi Samir Abasovu 4 oyunluq cəzalandırıb. Abasov "Qarabağ"a 0:2 hesabı ilə uduzduqları Azərbaycan Premyer Liqasının XI turunun oyunundan sonra hakimi təhqir etdiyi üçün bu cəza ilə üzləşib. Hələ üstəlik, “ağ-qaralar” da buna görə 10000 manat cərimələnib.

Təbii ki, heç kimin digərini təhqir etməyə haqqı yoxdur. Samir Abasov da təhqirə yol veribsə, mütləq cəzalanmalıdır. Bu, birmənalı şəkildə belədir. Lakin məsələnin digər tərəfi var. Samir Abasov hakimə əsəbləşdi, təhqirə yol verdi, cəzasını aldı. Bəs bu söyüşə səbəb olanlar, loru dildə desək, söydürənlərə hansı cəza düşür?

Söhbət “Qarabağ” - “Neftçi” oyunundan getmir. Buna qədər cari mövsümdə dəfələrlə hakim səhvlərinə şahidlik etmişik. Bu baxımdan ən çox əziyyət çəkən isə qeyd-şərtsiz “Neftçi”dir. Hakimlər “ağ-qaralar”ın bu mövsüm 5-7 xalını “yeyiblər”. “Sabah”la oyunda İnqilab Məmmədov “Neftçi”nin lehinə penalti qərarı versə də, sonradan VAR-a gedərək qərarını ləğv etdi. Olan “Neftçi”nin iki xalına oldu. “Zirə” ilə görüşdə bugünə qədər videosu ortaya qoyulmayan kobudluğa görə “Neftçi”nin qapısına penalti təyin edildi? Edildi. Bəlkə də həqiqətən də o epizodda kobudluq olub, lakin fakt budur ki, bu günə qədər ortaya heç bir görüntü qoyulmayıb. Eynən “Neftçi”nin “Araz-Naxçıvan”ın qapısına vurduğu ikinci qolda olduğu kimi. Yəni hara fırladırsan-fırlat, “Neftçi” bu günə qədər hakim səhvləri ucbatından xallar itirib. Təsəvvür edin ki, mövsümün sonunda “Neftçi” məsələn, ikinci yeri tutur və çempion olan X komandadan cəmi 3 xal geri qalır. Bu halda bəs necə olacaq? “Neftçi” deməyəcək ki, ay hörmətli, əziz hakimlər, sizin səhvləriniz olmasaydı, mən indi çempion idim... Deməyəcək? Əlbəttə deyəcək. Amma nə olsun, məşhur “Bala başa bəla” tamaşasında deyildiyi kimi, iş işdən keçəndən sonra tumanbağını bərkitməyin nə mənası?..

Yaxud olmasın “Neftçi”, olsun “Turan Tovuz”. AFFA Hakimlər Komitəsinin sədri Frank De Blekere nəhayət ki, özündə cəsarət tapıb hakimlərin səhvini etiraf etdi. Belçikalı dünən hər tur olduğu kimi mübahisəli epizodları şərh edərkən bildirdi ki, Əliyar Ağayevin "Zirə" - "Turan Tovuz" matçında meydan sahiblərinin futbolçusu Brahim Konateyə göstərdiyi qırmızı vərəqəni “sarı” ilə əvəzləməsi yanlış qərar idi. Bəlkə də bu, De Blekerenin cəsarəti deyil e, sadəcə belçikalı da hər tur hakim səhvlərini malalamaqdan bezib. Belçikalının açıqlamasından məlum olur ki, hakimin səhvi ucbatından “Turan Tovuz” çox yaxşı şansdan məhrum olub. Hər halda “Zirə” meydanda 10 nəfərlə qalsaydı, Tovuz klubunun qələbə şansı daha artıq olardı.

Hörmətli AFFA, hakimləri təhqir edənləri cəzalandırırsınız, düz edirsiniz. Bəs bu klubların haqlarını yeyənləri kim cəzalandıracaq? Onların aqibəti necə olacaq? Belə çıxır ki, İnqilab Məmmədov, Əliyar Ağayev, yaxud bir başqası istədiyini edəcək, klublar da, fərqi yoxdur, – bu gün “Neftçi”, “Turan Tovuz”, sabah “Zirə”, “Kəpəz”, birsigün “Şamaxı”, “Karvan-Yevlax” – bunun hərtərəfli cəzasını çəkəcək? Bəlkə bir dəfə də söyənlə yanaşı, söydürənləri də cəzalandırasınız?..

TAĞI