Samir Abasov: “Bu qədər adamın oyuna gəlməsinin səbəbi "Qarabağ" yox, “Neftçi”dir”

Bu gün Azərbaycan Premyer Liqasının 11-ci turunda "Qarabağ" "Neftçi"ni 2:0 hesabı ilə məğlub edib.

Futbolxeber.az saytının məlumatına görə, oyundan sonra keçirilən mətbuat konfransında "Neftçi"nin baş məşqçisi Samir Abasov jurnalistlərin suallarını cavablandırıb:

-  Mən də ölkəmizi təbrik edirəm. Allah şəhidlərimizə rəhmət eləsin.

- Emin Mahmudovun əvəzlənməsi nə ilə bağlı idi?

- Oyundan əvvəl onun zədəsi vardı. Ona görə də bir hissəni Mahmudov, digər hissəni isə Rezabalanı oynatdım. Birinci hissənin sonlarına yaxın Mahmudov özü dəyişilmək istədiyini göstərdi.

- Vensan Abubakarın bugünkü oyunu barədə fikriniz necədir?

- Komanda pis oynamadı. "Qarabağ"a qarşı səfərdə oynamaq asan deyil və onların səviyyəsini görmək mümkündür. Birinci hissədə düzgün və yaxşı futbol sərgilədik, bu performansı sona qədər davam etdirdik. Abubakarın epizodlarda iştirak etməməsi "Qarabağ"ın güclü müdafiəsi ilə bağlı idi. 2-3 imkan vardı ki, onlardan yararlana bilərdik. Uduzmağımızın səbəbi komandamızın ümumi oyunudur. Əsas odur ki, güclü hücumçularımız var və Abubakarın gəlməsi ilə digər hücumçular motivasiyasını artırdı. Lakin mənimlə razılaşmaya bilərsiniz, amma belə derbilərdə ucuz penaltilər verilməsi düzgün deyil. Elçin Məsiyev kontakt oyun olduğunu qeyd edirsə, niyə "Zirə" və "Turan Tovuz" matçlarında belə penalti verilmədi? Bu, oyunçulara mənfi təsir göstərdi.

- İstədiyiniz nəticəni əldə etməyə nə mane oldu?

- Qol vurmalısan ki, udasan. Komandamdan çox razıyam. Fərqli "Neftçi"ni izləyirik. Bu gün bu qədər adamın oyuna gəlməsinin, əsla "Qarabağ" və onların oynadığı oyun deyil, "Neftçi"dir. Hamıya ümid vermişdi, davam edir. Çox yaxşı komanda qururuq. Pis oynamadıq. Bəzi oyunçular meydançada çox yaxşı idilər. Bəzi planlar pozuldu. Nəyi daha yaxşı edə bilərik deyə, onun üzərində işləyəcəyik.

- "Neftçi" qolu buraxdıqdan sonra riskə gec getdiniz. Səbəb nə idi?

- Səbirlə hərəkət edirdik. Alesio Kurçini də oyuna daxil etmək istəyirdik, amma Emin Mahmudovun oyundan çıxması bütün planları pozdu. Düşünürdük ki, 70-75-ci dəqiqələrdə hücumameyilli və sürətli oyunçuları daxil edək. Sıx müdafiə olunurduq və hesab edirəm ki, gecikmə olmadı, sadəcə plan pozuldu.

- Futbolçularun bəzi epizodlarda fərdi oynamasına fikriniz necədir?

- Bu, düzgün qərar idi. Rəqib yüksək pressinq tətbiq edirdi və bu şəraitdə bir oyunçunun əksilməsi vacib idi. Pressinq top itkisinə səbəb ola bilərdi, belə oyun isə komandamızın inkişafına müsbət təsir edir.