Sərxan Hacıyev İstanbulda Elxan Məmmədovun da iştirak etdiyi tədbirə yollandı

UEFA-nın Türkiyədə nümayəndəliyi fəaliyyətə başlayacaq.

Futbolxeber.az saytının məlumatına görə, bu gün İstanbulda nümayəndəliyin açılış mərasimi keçiriləcək.

AFFA-nı tədbirdə icraçı vitse-prezident Sərxan Hacıyev təmsil edəcək.

“Teleqraf”ın yazdığına görə, tədbirdə AFFA-nın sabiq baş katibi, hazırda FIFA-nın Üzv Assosiasiyaların direktoru Elxan Məmmədov da iştirak edir. E.Məmmədov ötən gün tədbir iştirakçıları üçün verilən ziyafətə qatılıb. Xatırladaq ki, S.Hacıyev əvvəllər AFFA-nın sabiq baş katibinin müavini olub.

Açılış mərasimində Türkiyə Prezidenti Rəcəb Tayyib Ərdoğan, UEFA rəhbəri Aleksander Çeferin və bir neçə federasiya rəhbərlərinin iştirakı gözlənilir.

Tədbir Bakı vaxtı ilə saat 13:00-da başlayacaq.

Qeyd edək ki, UEFA İngiltərənin paytaxtı London və Belçikanın paytaxtı Brüsseldən sonra sayca üçüncü nümayəndəliyini İstanbulda açacaq.