Millimizin üzvü DÇ-2026-nın püşkünü dəyərləndirdi: “Məğlubedilməz rəqib yoxdur”

Milli komandamızın müdafiəçisi Abbas Hüseynov DÇ-2026-nın seçmə mərhələsinin püşkünü dəyərləndirib.

Futbolxeber.az saytına müsahibəsində “Qarabağ”ın müdafiəçisi bildirib ki, rəqiblər güclü olsa da, uğurlu nəticə qazanmaq üçün əllərindən gələni edəcəklər: “İstər Ukrayna, istər İslandiya, istərsə də sonuncu rəqibimiz olacaq Fransa və ya Xorvatiyanın əlavə təqdimata ehtiyacı yoxdur. Hər biri güclü komandalardır. Lakin məğlubedilməz rəqib yoxdur. Ümid edirəm ki, seçmə mərhələnin oyunlarında yaxşı çıxış edəcəyik. Hər bir matçda canımızı meydanda qoysaq, yaxşı nəticə ilə xalqımızı sevindirə bilərik”.

“Sonuncu rəqibimizin Fransa olmağını istərdiniz, yoxsa Xorvatiya?” sualını Abbas Hüseynov belə cavablandırıb: “Hər ikisi səviyyəli, güclü rəqibdir. Hansınısa seçmək çətindir. Hər ikisinin heyətində ulduz futbolçuların sayı kifayət qədər çoxdur. Bizim üzərimizə düşən bacardığımızın ən yaxşısını edib, nəticə qazanmaqdır. Ürəklə oynasaq, hər şey yaxşı olar”.