Elmar Baxşıyev: “Bəzən belə də olur. Üstün oynayırsan, amma uduzursan”

“Maraqlı oyunun şahidi olduq. Oyunun tempi, dinamikası yaxşı idi. Hər iki komanda ən yaxşısını etməyə çalışırdı. Oyunumuzdan məmnunam. Komanda istədiyim futbolu verməyə çalışırdı. Futbolda bəzən belə də olur. Üstün oynayırsan, amma uduzursan. Yolumuza davam edirik. Bu matçı unudacağıq”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev “Sabah”a 0:1 hesabı ilə uduzduqları oyundan sonra deyib.  

Matç ərzində “Araz-Naxçıvan”ın əleyhinə xeyli sayda hakim səhvi olsa da, Baxşıyev referinin üzərinə yüklənmək istəməyib: “Mən birinci hissədəki epizodu penalti gördüm. Mənə görə penaltidir. Amma hakim dedi ki, yüngül müdaxilədir. Bir az fərqlidir. Düşünürəm ki, Hakimlər Komitəsi ilə görüş olanda, yüngül və sərt toxunuşları bizə başa salacaqlar. İkili mübarizəli oyunun şahidi olduq. Hər iki komanda meydançada mübarizə aparırdı. Oyun da göstərirdi ki, qol vuran komanda qalib gələcək. Şanssızlıq deməzdim. Futbolda bu qaçılmazdır. Heç kəs epizodlardan sığortalanmayıb. Düşünürəm ki, daha artığını etməliyik ki, bu epizodları dəyərləndirək”.

"Qarabağ" oyun ərəfəsində uduzmağınız komandanın əhval-ruhiyyəsinə necə təsir edəcək?” sualını mütəxəssis belə cavablandırıb: “Bu sualı birinci turdan sonra da vermişdilər. Deyirdilər ki, "Qarabağ"a 1-4 uduzduz, komanda həmin təsirin altından necə çıxacaq. Çempionat uzundur, oyunlar fərqlidir. Bir matçda uduzmusan. Nəyə görə ruh düşkünlüyü yaranmalıdır? Komandamız, oyunçularımız möhkəmdir. Məğlubiyyətlər olacaq. Futbolçularıma inanıram. İnanıram ki, onlar ən yaxşısını edəcəklər”.