Ayxan Quseynov “Qarabağ” üzərində qələbəni şərh etdi: “Çoxdandır bu anı gözləyirdik”

“Turan Tovuz”un yarımmüdafiəçisi Ayxan Quseynovun Futbolxeber.az saytına müsahibəsi

- Azərbaycan Premyer Liqasının IV turunda səfərdə “Qarabağ”ı məğlub etməklə turnir cədvəlində zirvəyə yüksəldiniz. Qələbəni necə şərh edərdin?

- Çoxdandır bu anı gözləyirdik. Məşqlərdə çox ciddi hazırlaşırdıq. Məlum məsələdir ki, “Qarabağ” güclü komandadır. Onlar barədə nəsə demək artıqdır. Baş məşqçimiz tapşırmışdı ki, taktiki cəhətdən diqqətli oynayaq, səhv etməyək. Çünki bu halda rəqib bizi dərhal cəzalandıra bilərdi. Özümüz isə əks-hücumlara daha çox diqqət ayırırdıq.

- Demək olar ki, Kurban Berdıyevin qurduğu taktika özünü doğrultdu?

- Düzdür, müəyyən səhvlərimiz olurdu. Hər halda “Qarabağ”a qarşı oynayırsansa, səhvsiz çox çətindir. Amma bütün gücümüzü meydanda qoyduq. Əlimizdən gələni etdik ki, Berdıyevin tapşırıqlarını yerinə yetirək. Əgər qol buraxmadıqsa və qələbə qazandıqsa, deməli, hər şey alındı.

- Matçın sonlarına yaxın bir neçə qol şansını boşa verdiniz. İkinci qolu vurub, oyunun taleyini daha tez həll etməyinizə nə mane oldu?

- Həqiqətən də epizodlarımız var idi. Düşünürəm ki, bir qədər soyuqqanlılıq çatmadı. Müdafiədə konsentrasiyanı itirmədik. Tapşırıqları lazımi səviyyədə yerinə yetirdik. Lakin hücumda daha keyfiyyətli, daha soyuqqanlı olmaq lazımdır. Məşqlərdə bunun üzərində çalışırıq. İnanıram ki, tezliklə yaxaladığımız şansları daha yaxşı dəyərləndirəcəyik. Bunun üzərində işləyirik.

- Bir epozidda Riçard Almeyda kobud oynasa da, hakim ikinci sarı vərəqəni göstərmədi və bu, bir qədər narazılıqla qarşılandı. Həmin epizod barədə nə deyəö bilərsən?

- Hakimlərin qərarını şərh etmək istəmirəm. Sadəcə onu deyim ki, bəli, epizodu gördüm, məncə, hakimin qərarı düzgün idi. Cərimə olsa da, sarı vərəqəlik epizod deyildi. Hakimlərdən hər hansı bir narazılığım yoxdur.

- Növbəti turda “Səbail”i qəbul edəcəksiniz. “Turan Tovuz” uğurlu çıxışını bu matçda da davam etdirə biləcək?

- “Səbail” yaxşı komandadır. Son turda böyük hesablı qələbə qazanıblar. Buna görə də Tovuza yüksək əhval-ruhiyyədə gələcəklər. Lakin hamı bilir ki, bizim meydanımızda oynamaq rəqiblər üçün çətindir. Azarkeşlər bizə gözəl dəstək verirlər. “Səbail”lə matça da 3 xal üçün çıxacağıq. Əlimizdən gələni edəcəyik ki, həm uğurlu çıxışımızı davam etdirək, həm də azarkeşlərimizi sevindirək.

Fərəc Aslanov