"Linkoln"un baş məşqçisi: "Heç nə alınmadı"

“Çətin oyun oldu. Kiminlə qarşılaşdığımızı bilirdik. Dik durmağa çalışdıq. Amma bilirdik ki, hansı komanda ilə oynayırıq. "Qarabağ" çox güclü idi. Sona qədər vuruşduq. Lakin heç nə alınmadı, bacarmadıq”.

Futbolxeber.az saytının məlumatına görə, bu sözləri Çempionlar Liqası II təsnifat mərhələsinin cavab oyunu çərçivəsində Bakıda "Qarabağ"a 0:5 hesabı ilə məğlub olan "Linkoln"un baş məşqçisi Xavyer Munyos matçdan sonra keçirilən mətbuat konfransında deyib.

Daha sonra o, jurnalistlərin suallarını cavablandırıb:

- Bugünkü "Qarabağ" Çempionlar Liqasının qrupunda oynaya bilər?

- Həqiqətən çox güclü komandanız var. Qurban Qurbanov uzun müddətdir buradadır. Bəlli ideyası, strategiyası olan komandanız var. Bu komandada olan istedadlı futbolçular, performanslarına görə ÇL-in qrupuna əsas namizədlərdən sayılır. Amma futbol oynamaq, mərhələlər keçmək lazımdır.

- İmkanınız olsaydı, "Qarabağ"dan hansı futbolçunu heyətinizə qatardınız?

- Əslinə qalsa, əlimdə olan heyətdəki oyunçulardan razıyam. Bütün futbolçularınız çox güclüdür. Təkcə birini seçmək çox çətindir.