Elmar Baxşıyev: “İstədiyimiz mövqelər dolandan sonra iddiadan danışmaq olar”

“Araz-Naxçıvan”ın baş məşqçisi Elmar Baxşıyevin Futbolxeber.az saytına müsahibəsi

- Əvəzedicilərə qarşı keçirilən yoxlama matçında 3:1 hesablı qələbə qazandınız. Bu görüş komandaya nə verdi?

- İstədiyimiz komandanın meydançanı tam hiss eləməyi idi. Son 2-3 gündə ağır məşqlərimiz olmuşdu. Buna görə də yükləmə altında komandanı görmək istəyirdik. Ümumi fikirlərimiz nə idisə, komanda da onu bizə qaytardı.

- Əvəzetmələrlə bağlı bir qədər çətinliyiniz var idi. Komanda kənardan çox kasad görünürdü. Çempionatın startına bir ay qalmış bu məqam sizi nə dərəcədə narahat edir?

- Komanda hazırda komplektləşir. Bəzi mövqelər üzərində iş gedir. Üstəlik, bəzi oyunçularımız – Ömər Buludov və Miço Kuzmanoviç xəstəlik səbəbindən meydana çıxmamışdılar. Onlar hazır deyildilər. Vaxtımız var. Qarşıdakı günlərdə komandaya yeni oyunçular qoşulacaq.

- Yəqin ki, əsas hücum xəttini gücləndirmək istəyirsiniz.

- Mərkəz hücumçusu, “10 nömrə” və müdafiənin mərkəzinə axtarışlarımız davam edir. Bu üç mövqeyə mütləq transfer olmalıdır.

- Yeni transferlərdən olan Karlos Jatoba əvəzedicilərlə görüşdə hücumun arxasında yer almışdı. Bu, məcburiyyətdən atılmış addım idi, yoxsa braziliyalıya elə həmin mövqedə şans vermək barədə düşünürsünüz?

- Jatoba meydanın mərkəzində hər bir mövqedə oynaya biləcək futbolçudur. Ona görə də müxtəlif mövqelərdə şans verməyimiz mümkündür. Keyfiyyətli oyunçudur. Düşünürəm ki, komandaya xeyri dəyəcək.

- Yeni mövsüm üçün rəhbərliyin sizdən istəyi nədir? Avrokubok tələbi varmı?

- İndiki durumda bizi də, rəhbərliyi də daha çox düşündürən heyətin tez bir zamanda komplektləşdirilməsidir. İstədiyimiz mövqelər dolandan sonra iddiadan danışmaq olar.

- Belə çıxır ki, hələ bu barədə danışmamısınız?

- Yox, əsas məsələ hazırda heyətin komplektləşdirilməsidir.

- Bəs indi olmasa belə, mövsümün ikinci yarısında Naxçıvana köçmək məsələsi nə dərəcədə real görünür?

- Bu, mənə aid sual deyil. Yalnız onu deyə bilərəm ki, biz də istərdik ki, ev oyunlarımızı Naxçıvanda keçirək. İnşallah inanıram ki, bu yöndə işlər gedəcək və komanda öz doğma meydanında oynayacaq.

- Son mövsüm çempionat çox gərgin alındı. Sizcə, hazırkı gedişata əsasən növbəti mövsümdən nə gözləmək olar? Ötənilkindən də gərgin mübarizəyə şahidlik etməyimiz mümkündür?

- Transferlər onu göstərir ki, heç bir komanda iddiasından əl çəkməyəcək. İldən-ilə çempionat daha da ağır olur. Bu, bir tərəfdən yaxşıdır ki, komandadalar rəqabətədavamlı olurlar. Hər halda nə qədər çox rəqabət olsa, çempionat da bir o qədər inkişaf edər.

- “Qəbələ”dən komandaya cəmi 2 futbolçu cəlb etdiniz. Urfan Abbasov və Ülvi İsgəndərovdan başqa, sabiq klubunuzdan maraq dairənizdə olan yox idi, yoxsa digərlərinin keçidi alınmadı?

- Sırf yerli futbolçularla bağlı bizə lazım olan mövqeyə Urfan və Ülvi idi, onların üzərində dayandıq. Amma qarşıdakı günlərdə yenə də kimsə ola bilər.

İbrahim CƏFƏROV