Aleksey İsayev: “Qarabağ”da bacarığımın heç 50 faizini belə göstərməmişəm”

“Qarabağ”ın yarımmüdafiəçisi Aleksey İsayevin Futbolxeber.az saytına müsahibəsi

- “Qarabağ”la birgə ölkə çempionu oldunuz. Təəssüratlarınız necədir?

- Çox şadam. Düzdür, cəmi yarım ildir burdayam. Komandada yeni olsam da, özümü “Qarabağ”ın bir parçası hesab edirəm. Əlimdən gələni edəcəm ki, növbəti çempionluqlarda daha çox pay sahibi olum.

- Səhv etmiriksə, bu, karyeranızdakı ilk çempionluqdur.

- Bəli, elədir. Bu hissi yaşamaq çox gözəldir. Karyeramda ilk çempionluğumu “Qarabağ”la birgə qazandığım üçün sevinirəm.

- Qarşıdan kubokun finalı gəlir. “Qarabağ”ın “qızıl dubl” etmək şansını necə dəyərləndirirsiniz?

- Çətin oyun olacaq. Hamı gördü ki, “Zirə” bu il çox yaxşı futbol sərgiləyir. Ümumiyyətlə, Rəşad Sadıqovun rəhbərliyi altında bir neçə ildir “Zirə”də iddialı kollektiv formalaşıb. Bizim kimi onlar da kuboku qazanmaq istəyirlər. Ona görə də gərgin, mübarizə dolu bir finala şahidlik edəcəyimizi düşünürəm.

- “Zirə”nin finala qədər Avroliqaya vəsiqəni təmin etməsi “Qarabağ”ın lehinədir, yoxsa əleyhinə?

- Bu, ciddi şəkildə nəyisə dəyişmir. İkinci yeri tutduqları üçün onları təbrik edirəm. Amma finalda var gücləri ilə oynacaqları dəqiqdir.

- O mənada ki, “Zirə” meydana təzyiq altında çıxmayacaq...

- Orda professionallar cəmləşib. Hər biri peşəkar futbolçudur və meydana yalnız titul qazanmaq üçün çıxacaqlar. Məncə, çempionatdan avrokuboklara vəsiqə qazanmasaydılar belə, finala eyni motivasiya, eyni istəklə çıxacaqdılar.

- Son mövsümdəki uğurlu çıxışdan sonra “Qarabağ”dan avrokuboklardakı gözləntilər artacaq...

- Finaldan sonra ilk növbədə istirahət etməliyik. Daha sonra yüksək səviyyədə hazırlıq keçib, avrokuboklarda mübarizəyə qoşulacağıq. İnanıram ki, daha yaxşı nəticələr qazanmaq mümkün olacaq.

- Gələcək planlarınız yalnız “Qarabağ”la bağlıdır?

- Əlbəttə. Komandaya daha çox kömək etmək istəyirəm. Çünki kollektiv məni öz doğması kimi qarşıladı. Bütün bunların qarşılığını meydanda verməliyəm. Söz verirəm ki, bacardığım futbolu sərgiləyəcəm.

- Qışda “Qarabağ”a keçərkən bəziləri sizin səhv seçim etdiyinizi bildirirdilər. Demək olar ki, Aleksey İsayev artıq yeni klubunda özünü sübut edib?

- Xeyr. Bacarığımın heç 50 faizini belə göstərməmişəm. Hər şey irəlilədir. Özümə inanıram, bacaracağam. Düzdür, komandamızda güclü rəqabət var. Lakin bu məqam mənim üçün çox xoşdur. “Qarabağ”da olmaqdan məmnunam.

İbrahim CƏFƏROV