Leandro Andrade transfer məsələsində son nöqtəni qoydu: "Qarabağ"da qalmaq istəyirəm"

"Qarabağ"ın yarımmüdafiəçisi Leandro Anradenin Futbolxeber.az saytına müsahibəsi

 

- Azərbaycan Premyer Liqasının 35-ci turunda "Turan Tovuz" üzərində qazanılan 4:3 hesablı qələbəni necə şərh edərdiniz?

 

- Düzünü desəm, qələbə qazanmaq bizi sevindirsə də, bu qazandığımız 3 xal bir o qədər əhəmiyyətli deyil. Bizi qarşıda daha vacib olan Azərbaycan kubokunun final matçı gözləyir. Həmin oyuna hazırlaşmalıyıq. Bugünkü matçda etdiyimiz səhvləri, buraxdığımız 3 qolu, "Zirə"yə qarşı final matçında təkrarlaya bilmərik. Belə oynamaq olmaz. 

 

- İkinci hissənin əvvəlində rəqib ardıcıl 2 qol vurmaqla hesabda önə keçdi. Bu, nədən irəli gəldi?

 

- Buraxdığımız qolların heç biri fərdi səhvlərdən baş vermədi. Əks-hücumdan qollar buraxırdıq. Geriyə getməkdə çətinlik çəkirdik. Qapıçıdan başlayaraq hər bir mövqe oyunçusunun etdiyi səhvlərə görə bu cür qollar buraxıldı. Bu cür xətaları qəbul etməliyik. Qarşıda bunun kimi hallar baş verməsin deyə daha yaxşı hazırlaşacağıq. 

 

- 69-cu dəqiqədə meydana çıxsanız da, dubl etməyə imkan tapdınız...

 

- Fərqlənmək, komandanın qələbəsində pay sahibi olmaq xoş hisslərdir. Bəzən qol vurarkən belə bəzi səhvlərə yol vermək olur. Lazım olanı etmək alınmır. Ola bilər buraxılan son qolda mənim də səhvim olub. Dediyim kimi, bu oyunda 3 qol buraxsaq da, final matçına köklənməliyik. Uğursuzluqla üzləşə bilmərik, hazırda "Qarabağ" Azərbaycan çempionudur. 

 

- Portuqaliya mətbuatında İstanbul klublarının sizinlə maraqlandığı barədə xəbərlər yayılıb. Bu, nə dərəcədə doğrudur?

 

- Belə xəbərlərə əhəmiyyət vermirəm. Daim belə xəbərlərlə diqqət mərkəzində qalmaq yaxşı hal deyil. Çalışıram, bu cür məlumatları oxumayım. Hazırda ciddi nəsə baş vermir. "Qarabağ"da qalmaq istəyirəm. Burada çıxış etmək mənim üçün xoşdur. 

 

- Son turdan gözləntiləriniz nədir?

 

- Həmin matçda bizə Azərbaycan çempionatının qalibi kimi kubok təqdim olunacaq. Həmin anı səbirsizliklə gözləyirəm. Biz çılğın şəkildə bu qalibiyyəti qeyd edəcəyik. Futbolundan gözəlliklərindən zövq almaq lazımdır. Artıq çempionuq, Premyer liqanın son matçından da xoş hisslərlə ayrılmağa çalışacağıq. Müdafiədə oturmaq fikrimiz yoxdur. Həmin oyundan sonra isə Azərbaycan kubokunun final matçına hazırlaşmalıyıq. 

 

Azad Nuriyev