U-21 millimiz artıq Makedoniyadadı

21 yaşadək futbolçulardan ibarət milli komandamız vətəni tərk edib. Futbolxeber.az-ın məlumatına görə, noyabrın 15-də Avropa çempionatının seçmə mərhələsi çərçivəsində Makedoniyanın qonağı olacaq Bernhard Lippertin yetirmələri bu gün səfərə çıxıb. U-21 yığmamız Makedoniya paytaxtına Bakı-İstanbul-Skopye reysi ilə üz tutub. Sabah komandamız adıçəkilən ölkədə ilk məşqinə çıxacaq.

Xatırladaq ki, noyabrın 15-də keçiriləcək Makedoniya - Azərbaycan matçı Bakı vaxtı ilə 20:00-da start götürəcək.

Hazırda 4 oyundan sonra aktivində 4 xal olan millimiz qrupda üçüncü pillədə qərarlaşdığı halda, 2 oyundan sonra cəmi 1 xal toplayan Makedoniya yığması qrup sonuncusudur. Makedoniya tsikldəki yeganə xalını elə Bakıda qazanıb. Paytaxtımızda keçirilən oyunda hesab açılmamışdı.