Tiaqo Almeyda: “Sumqayıt”ın məqsədi turnir cədvəlində daha yuxarı pillələrə qalxmaqdır”

“Komandamız oyuna bir qədər uğursuz başladı və "Araz-Naxçıvan"ın necə oynadığını anlamağımız bir qədər vaxt apardı. Rəqibin yarımmüdafiəçiləri mərkəzdə çox boşluq tapırdı. Fasilədən sonra rəqibin yaratdığı boşluqlardan maksimum istifadə edə bildik”.

Futbolxeber.az saytının məlumatına görə, bu sözləri “Sumqayıt”ın müdafiəçisi Tiaqo Almeyda Azərbaycan Premyer Liqasının VIII turunda “Araz-Naxçıvan”ı 2:1 hesabı ilə məğlub etdikləri oyundan sonra deyib.

Portuqaliyalı müdafiəçi uğurlu çıxış etdirməyə çalışacaqlarını bildirib: “Komandamız hazırda yaxşı formadadır. Düşünürəm ki, indiyə qədər olduğu kimi çalışmağa davam etsək, bu uğurlu seriyanı davam etdirə bilərik”.

26 yaşlı futbolçu “Sumqayıt”ın hədəflərindən də söz açıb: “Komandanın hədəfi hər oyuna ayrı-ayrılıqda yanaşmaq, getdikcə daha yaxşı oynamaq və turnir cədvəlində mövqeyimizi yüksəltməkdir. Məqsədimiz turnir cədvəlində daha yuxarı pillələrə qalxmaqdır”.