Qurban Qurbanov: “Əfsuslar olsun ki, vəziyyət belədir”

"Futbolçularımı təbrik edirəm. Bu oyuna köklənmək bir az çətin idi. Amma onlar bunu bacardılar. Heyətdə xeyli dəyişiklik etmişdik. Çatışmazlıqlar oldu. Lakin üstünlüyü saxlaya bildik. İlk yarı qapalı oyun oldu, ikinci yarı daha açıq oyun getdi. Yaxşı, sürətli hücumlar gördük. Samir Abasova uğurlar arzulayıram".

Futbolxeber.az saytının məlumatına görə, bu sözləri "Qarabağ"ın baş məşqçisi Qurban Qurbanov Premyer Liqanın 24-cü turunda “Sumqayıt”ı 2:0 hesabı ilə məğlub etdikləri oyundan sonra deyib.

O, növbəti turda "Neftçi" ilə oyunun təxirə salınmadığını bildirib: “Həm "Neftçi", həm də "Qəbələ" ilə oyun təsdiqlənib. İki oyununun təxirə salınmasının çətin olduğunu dedilər”.

Qurbanov "Bayer"in düşərgəsində olarkən Xabi Alonso ilə apardıqları müzakirələrdən də söz açıb: “Daha çox nəyə üstünlük verməsi ilə bağlı söhbətimiz oldu. Bəzən oyunun gedişatında oyunun stilində dəyişiklik edir. Bunu analizlərdə görmüşdük, oyunlarına çox baxmışdıq. Almaniyadakı matçda fərqli tələbləri var idi, Bakıdakı görüşdə fərqli. Düşündüklərimiz var idi, onu özü də dedi. Futbolun dili birdir. Oyunçuların ustalıq səviyyəsi, oyun sürəti, ilboyu o tempə dözmək... Bu, daha üstün cəhətdir”.

Mütəxəssis çempionatdakı rəqiblərin “Qarabağ”a müqavimət göstərə bilməməsinə belə münasibət bildirib: “Mənim üçün cavab vermək çətindir. Biz bu çempionata, oyunlara uyğunlaşmışıq. Oyunçuları lazım olan dərəcədə, qaydada hazırlayırıq. Azərbaycan futbolu üçün daha da böyük çempionat olsa, biz qarışıq hamımız güclənsək, azarkeş üçün maraqlı olar. Amma bugünkü potensialımız budur və bununla da razılaşmalıyıq”.

Q.Qurbanov vurğulayıb ki, futbolun səviyyəsini qaldırmaq üçün azarkeş amili böyük rol oynayır: “Azarkeş stadionda olanda, oyunlar gözəl, daha yaxşı görünür, oyunlar da, futbolçular da aktiv olur. Futbolun səviyyəsini qaldırmaq üçün azarkeş amili böyük rol oynayır. Futbolçu potensialından daha da artığını etməyə çalışır. Azarkeşlər gəlsə, hamımız sevinərik. Oyunçular daha çox qol vurmaq istəyər. Daha çox faydası var. Amma əfsuslar olsun ki, vəziyyət belədir”.

“Qarabağ”ın çalışdırıcısı Adama Diakabi ilə vidalaşmaq fikrində olmadıqlarını söyləyib: “Bizim tərəfimizdən iddia olmayıb. Biz klub, məşqçi olaraq, ona heç nə deməmişik. Sadəcə, mətbuatda "Qarabağ" onu göndərmək istəyir deyə, yazılar çıxmışdı. Bu da məlumdur. Az oynayırdı, az şans qazanırdı, Avropa Liqasının siyahısına salmadıq deyə, belə fikirlər formalaşdı. Lakin Adama bizim futbolçumuzdur, onunla mövsümün sonuna qədər müqaviləmiz var. Ona görə gündəmdə belə bir şey yoxdur”.

Qurban Qurbanov köməkçisi Zaur Tağızadənin mətbuata qapalı olmasına da toxunub: “Elə ona görə də "qızıl oğlan"dır (gülür). Zaur həqiqətən də "qızıl oğlan"dır. Hamı onun xətrini çox istəyir. Futbolçu vaxtlarında da müsahibələrini nadir vaxtlarda görürdüm. Hərənin öz işi var. Sizlərə müsahibə lazımdırsa, mən verirəm, nə sualınız varsa, verin (gülür). Onlar da öz işləri ilə məşğul olsun”.