Azər Bağırov: “Ləğv edilən penaltidən sonra uşaqlar “sındı”

"Zirə"ni təbrik edirəm. Birinci hissədə istədiyimizi edə bildik, mübarizə apardıq. Oyunun 60-cı dəqiqəsində oyundan düşdük və məğlub olduq. Toparlanıb, qarşıdakı oyunlara köklənmək lazımdır".

Futbolxeber.az saytının məlumatına görə, bu sözləri "Araz-Naxçıvan"ın baş məşqçisi Azər Bağırov Azərbaycan Premyer Liqasının 24-cü turunda "Zirə"yə 0:3 hesabı ilə uduzduqları oyundan sonra keçirilən mətbuat konfransında deyib.

O, "matçın qırılma anı penalti qərarının dəyişdirilməsi oldu?" sualına belə cavab verib: "Son dönəmlərdə əleyhimizə, leyhimizə o qədər qərarlar görürük ki... Çoxu da əleyhimizə olur. Xətti necə çəkirlər... Ondan qabaq da qol epizodlarımız oldu. Qol vursaydıq, tam başqa cür olardı. Belə oyunları uduzanda təsir edir. Çünki ilk yarıda istədiyimizi edirdik".

Mütəxəssis daha sonra söyləyib: “Əlbəttə,"Zirə"nin daha istəkli olacağını nəzərə almışdıq. Üç qol epizodunu da özümüz verdik. Təyin olunub, sonra ləğv edilən penaltidən sonra uşaqlar “sındı”.