Bəhlul Mustafazadə: “Braqa” ilə oyundan öncə bu məqam bizi çox düşündürür”

“Qarabağ”ın müdafiəçisi Bəhlul Mustafazadənin Futbolxeber.az saytına müsahibəsi

- Azərbaycan Premyer Liqasının XXII turunda “Sabah”la heç-heçə oynadınız. Xal itkisini nə ilə əlaqələndirmək olar?

- Konkret səbəb göstərə bilmərəm. Çətin və maraqlı oyun oldu. “Sabah” yaxşı təsir bağışladı. Bizim üçün “Braqa” ilə matçdan əvvəl yaxşı test oldu. Lakin daha diqqətli olmalıydıq. Çünki elementar səhvləyə yol verirdik və nəticədə qapımız qarşısında təhlükəli epizodlar yaranırdı. “Braqa” ilə matçda eyni səhvləri təkrarlamamalıyıq.

- Son 2 matçda 7 qol buraxmağınız “Braqa” ilə oyundan öncə sizi nə dərədəcə narahat edir?

- Bu məqam bizi çox düşündürür. Müdafiədə daha etibarlı təsir bağışlamalı, daha diqqətli olmalıyıq. Çünki bizi qarşıda çox çətin matç gözləyir. “Braqa” ilə görüşdə bu səhvlər bizə baha başa gələ bilər.

- Çempionatdakı son 2 oyununuzda 8 penalti. Bunu nə ilə əlaqələndirmək olar: diqqətsizlik, yoxsa...?

- Diqqətsizlikdən də ola bilər. Bu qədər penalti olmasını mən də bəyənmirəm. Daha diqqətli olmalıyıq ki, bu cür hallar təkrarlanmasın.

- İkinci pillə ilə aranızda xal fərqinin çox olması çempionat oyunlarına maksimum dərəcədə motivasiya olmağınıza maneçilik törədir?

- Bəlkə də hardasa təsir edir. Amma belə olmamalıdır. Çünki hər birimiz peşəkarıq. Qarşıda bizi hansı oyunların gözlədiyini bilirik. Ona uyğun olaraq boşluğa yol verməməliyik.

- “Braqa” ilə matçdan gözləntiləriniz nədir?

- Ümidliyik, pozitiv yanaşmalıyıq bu matça. Mərhələ adlamaq üçün çalışacağıq. Rəqib kifayət qədər güclüdür. Lakin sona kimi mübarizə apacağıq ki, növbəti mərhələyə yüksələn tərəf məhz biz olaq.

- Həlledici məqam nə ola bilər? Məsələn, bəzi mütəxəssislər qeyd edirlər ki, “Qarabağ” erkən qol buraxmasa, qalan vaxtda daha inamlı təsir bağışlayar...

- Hər şey səfər matçında necə hazırlaşacağımızdan asılıdır. Erkən qolun həlledici amil olacağına inanmıram. Məsələn, “Frayburq”la səfər matçında qapımızda erkən qollar görsək də, sonradan toplarlandıq, daha yaxşı oyun sərgilədik. Önəmli faktor matça nə dərəcədə hazır olacağımızdır.

- Böyük ölçüdə “Qarabağ”ın əsas heyəti məlumdur. Hazırda əsas sual müdafiənin mərkəzi ilə bağlıdır. Seçim imkanı sizdə olsaydı, yanınızda hansı müdafiəçiyə şans verərdiniz?

- Həm Bədavi, həm də Maksim məndən qat-qat təcrübəldirlər. Bu barədə danışmağım, nəsə deməyim düz çıxmaz. Qurban müəllim kimə şans versə, o da əlindən gələni edəcək.

İbrahim CƏFƏROV