Adrian Mutu: “Layiqli qələbə qazandıq”

“Çox yaxşı oynadıq. Əvvəldən sona kimi nəzarət bizim tərəfimizdə idi. Layiqli qələbə qazandıq. "Araz-Naxçıvan"a təsadüfdən məğlub olmuşduq. Həmin matçdan sonra inkişaf var. Hücumda bir az çatışmazlıq var. Bunu aradan qaldırmağa çalışacağıq”.

Futbolxeber.az saytının məlumatına görə, bu sözləri "Neftçi"nin baş məşqçisi Adrian Mutu Azərbaycan Premyer Liqasının 8-ci turunda səfərdə "Turan Tovuz"u 1:0 hesabı ilə məğlub etdikləri matçdan sonra deyib.

O, komandasının müdafiə xəttində problem görünməsi fikri ilə razılaşmayıb: “Müdafiəçilərimiz bu gün yaxşı oynadı. 70 dəqiqə ərzində rəqibə qol epizodu vermədik. Deyə bilmərik ki, 90 dəqiqə ərzində rəqib qapımızın qarşısında təhlükəli vəziyyət yaratmayacaq. Futbolçulardan razı qaldım. Onları təbrik edirəm”.

O, Yuri Matiasın yoxluğuna da toxunub: “Vacib məqam o idi ki, Matiası layiqincə əvəz edən oyunçu olsun. Höccət çox yaxşı oyun nümayiş etdirdi. Qarşıdakı matçlarda kimi meydana buraxmaqda çətinlik çəkəcəyəm. "Zirə"dən sonra ən yaxşı müdafiə xətti bizdədir. Höccətin müdafiə keyfiyyətləri çox yaxşıdır”.

“Neftçi”nin çalışdırıcısı Tovuzdakı atmosferi bəyəndiyini söyləyib: “Möhtəşəm idi. İstərdik ki, bütün stadionlarda bu cür olsun. Azarkeşlərə demək istəyirəm ki, hər oyunda komandalarına belə dəstək versinlər”.

Rumın mütəxəssis növbəti turda "Qarabağ"a qarşı keçirəcəkləri oyundan da söz açıb: “Böyük oyundur. Son matçda onlar da qələbə qazanıb, biz də. Hər iki komanda yaxşı formadadır”.