Ayxan Abbasov: “Səhvlərimizdən nəticə çıxarmalıyıq”

“Çətin matç idi. "Neftçi"nin oyundan-oyuna daha yaxşı olduğunu görürük. Son matçlarda aqressivdirlər. İlk hissədə onların təzyiqinin qarşısında tab gətirə bilmirdik. İkinci hissədə şanslarımız oldu. Bir qol vursaydıq, oyun bitə bilərdi. Çempionatın ən gərgin dövrüdür. Səhvlərimizdən nəticə çıxarmalıyıq”.

Futbolxeber.az saytının məlumatına görə, bu sözləri “Turan Tovuz”un baş məşqçisi Ayxan Abbasov Azərbaycan Premyer Liqasının 8-ci turunda doğma meydanda "Neftçi"yə 0:1 hesabı ilə uduzduqları oyundan sonra deyib.

O, komandasının doğma meydanda qələbə qazana bilməməsi haqda bildirib: “Statistika onu deyir. İstəməzdik belə olsun. Amma gerçək budur. İnanıram ki, bunu aradan qaldıracağıq. Bizim Tovuzda yaxşı oyunlarımız, qələbələrimiz olub. Sadəcə bu il belə başladı. Bəlkə də bu gün bərabərlik bizim üçün motivasiya baxımından daha yaxşı olardı”.

Təcrübəli mütəxəssis komandanın ən yaxşı bombardiri Martin Petkovun start heyətdə yer almamasının səbəbini belə izah edib: “Dəyişikliklər olacaq. Rəqibə görə edirik. Paçu məşqlərdə yaxşıdır. Onun da oynaması vacibdir. Petkov da yaxşı formadadır”.

Abbasov Marandiçinin oyununda eniş hiss olunmasına belə münasibət bildirib: “Keçən il də belə olmuşdu. Milli komandada iki oyunda əsas heyətdə yer aldı. Yorğunluq hiss olunur. Ona görə ikinci hissədə onu əvəzlədik. Eniş olması normaldır”.