Ayxan Abbasov: “İki mövqeni mütləq gücləndirməliyik” (MÜSAHİBƏ)

Yeni mövsümün hazırlıqlarına başlayan “Turan Tovuz”un baş məşqçisi Ayxan Abbasov dünənki axşam məşqindən sonra hazırlıq prosesini izləyən Futbolxeber.az saytının əməkdaşının suallarını cavablandırıb:

- Artıq 2 gündür ki, yeni mövsümün hazırlıqlarına başlamısız. İlkin təəssüratlarınız necədi?  

- Yay fasiləsi bir az çox olur. Futbolçular il boyu stresdən, ağır yükləmələrdən sonra istirahət eləmək istəyirlər. Görsənir ki, istirahət də eliyiblər. Təbii ki, istirahətdən gələn futbolçunun durumu ideal olmur. Çalışacağıq ki, onları qısa zamanda ideal formaya salaq.

- Bəzən futbolçular istirahətdən artıq çəki ilə qayıdırlar. Siz belə problemlə üzləşməmisiz?

- Xeyr, futbolçularda artıq çəki yoxdu. Çünki istirahət vaxt futbolçuların özləri rejimə riayət ediblər. Yeganə çətinlik idman formasından uzaqda olmalarıdı.

- Hazırlığınız 2 mərhələdən ibarət olacaq...

- Bəli, ilk mərhələni gördüyünüz kimi Bakıda keçirik. Daha sonra isə Türkiyəyə yollanacağıq.

- Bakıdakı toplanış zamanı yoxlama oyununun keçirilməsi nəzərdə tutulub?

- Planımızda 1 oyun keçirmək var. Artıq “Araz Naxçıvan”la danışmışıq. İyulun 12-də onlarla üz-üzə gələcək. Türkiyə toplanışında isə 4 yoxlama matçımız olacaq.

- Belə görünür ki, Martin Petkovdan sonra daha bir hücumçu transfer etmisiz.

- Bəli, Otto Conun məsələsi həll olunub. İkinci hücumçu transferimizdi. Daha bir hücumçumuz da Braziliyadan gələcək. Eləcə də Belaji bizimlədi. İstəmişik ki, hücum planında rəqabət artsın, futbolçularımızın sayı çox olsun. Bütün futbolçular düşərgədə olandan sonra onları güclü rəqabət gözləyir.

- Gördüyümüz qədəri ilə düşərgədə baxışda olan futbolçular da var.

- Hazırda düşərgədə baxışda olan 3 legioner var. Onlardan biri fransızdı, digər ikisi isə Afrikadandı. Gənc futbolçulardı. Bakı toplanışında onları sınaqdan keçirəcəyik. Toplanışın sonunda bu 3 futbolçu ilə bağlı qərar verəcəyik.

- Hücum xəttindən başqa daha hansı mövqeləri gücləndirmək istəyirsiz?

- 2 mövqeni mütləq gücləndirməliyik - müdafiə və yarımmüdafiə. Bir əcnəbi stopperlə danışıqlarımız yekunlaşmaq üzrədi. Demək olar ki, razılıq əldə olunub. Lakin orta sahə üçün axtarışlarımız davam edir.

- Belə çıxır ki, yerli futbolçu transferini yekunlaşdırmısız...

- Əslində, maraq dairəmizdə olan bir yerli futbolçu var. Hazırda onunda danışıqlar aparırır. Lakin klubu ilə müqaviləsi olduğundan keçidi reallaşdırmaq üçün bir qədər çətinlik çəkirik. Görək nə olur.

Futbolxeber.az-ın teleqram kanalına abunə olun