“Slavçev və Martinov Azərbaycan futbolu haqda müsbət fikirlər səsləndirdilər”

"Təəssüratlarım yaxşıdı. Burada olduğum üçün xoşbəxtəm”.

Futbolxeber.az saytına müsahibəsində bu sözləri “Turan Tovuz”un yeni transferi Martin Petkov deyib.

Bolqarıstanlı forvard Tovuz klubuna keçidini belə şərh edib: “Təklif gəldikdən sonra “Turan Tovuz”u araşdırdım. Klub haqda kifayət qədər məlumatlıyam. Təklif olunan şərtlər məni qane etdi. Beləcə transferim reallaşdı”.

Petkov daha əvvəl Azərbaycanda çıxış etmiş həmyerlilərindən ölkəmiz haqda xoş sözlər eşitdiyini bildirib: “Azərbaycan çempionatı haqda məlumatım var. Daha əvvəl “Qarabağ”da forma geymiş Simeon Slavçev dostumdu. Onunla danışdım. Eləcə də “Səbail”də çıxış etmiş Emil Martinovla söhbətləşdim. Hər ikisi Azərbaycan futbolu haqda müsbət fikirlər səsləndirdilər”.

O, yeni klubundakı hədəflərindən də söz açıb: “Məqsədim hər oyunda qalib gəlmək, komandamın uğur qazanmasına yardımçı olmaqdı. Əlimdən gələni edəcəm ki, “Turan Tovuz” mövsümün sonunda ilk dördlüyə düşə bilsin. Eləcə də kubokda da iddialı olacağıq. Bilirəm ki, “Turan Tovuz” ötən mövsüm yarımfinalda “Neftçi”yə uduzub. Kim bilir, bəlkə bu final oynadıq”.

Futbolxeber.az-ın teleqram kanalına abunə olun