“7-8 dəqiqə VAR-a baxmaq olar?”

“Zirə”nin baş məşqçisi Rəşad Sadıqov Azərbaycan Premyer Liqasının XXXII turunda “Turan Tovuz”a qarşı keçirilən oyunun (1:3) idarəçiliyindən narazı qalıb.

Futbolxeber.az saytının məlumatına görə, matçda sonra təşkil olunan mətbuat konfransında təcrübəli mütəxəssis bununla bağlı deyib:

“İlk hissədə Rəhim Sadıqovun vurduğu qolun hesaba alınmamasını başa düşə bilmədim. Xəttə baxdım, diaqonal qoymuşdular. Anlaya bilmədim. Bunun bir açıqlaması olsa, çox yaxşı olardı. Əminəm ki, eyni epizod qapımızda yaşansaydı, qol hesaba alınacaqdı. Yaxud birinci penaltidə hakim VAR-a çağırılmayacaqdı. Orada 8 dəqiqə vaxt getdi. Nə bilim... “Neftçi” ilə kubok oyunumuzda da Keyta 8 dəqiqə əlində topla gəzdi. Bu qədər VAR-a baxmazlar axı. 7-8 dəqiqə VAR-a baxmaq olar? Qolumuzun hesaba alınmamasını həqiqətən də anlaya bilmədim. Mənə elə gəldi ki, qol idi”.