Mahmud Qurbanov: "Deyiləsi söz çoxdur, bəhanə axtarmaq fikrimiz isə yoxdur”

“Səbail”in baş məşqçisi Mahmud Qurbanov Premyer Liqanın 12-ci turu çərçivəsində “Kəpəz”ə qarşı keçirdikləri oyunu şərh edib.

Futbolxeber.az saytının Sport24.az-a istinadən verdiyi məlumata görə, o, 0:3 hesabı ilə məğlub olduqları matçdan sonra baş tutan mətbuat konfransında bunları söyləyib:

“Bura qələbə qazanmaq üçün gəlmişdik. Oyuna heç də pis başlamamışdıq. Oyunun qırılma nöqtəsi birinci hissənin ortalarında mərkəz müdafiəçimizin düşünülməyən hərəkətindən sonra qapımızda qol gördük. Ardından həmin futbolçu qırmızı vərəqə aldı. “Kəpəz” layiqli qələbə qazandı. Uduzmuşuq, uşaqlara deyiləsi söz çoxdur. Heç bir bəhanə axtarmaq fikrimiz yoxdur”.

- Gəncə sizə heç də yad yer deyil. Premyer Liqa çalışdırıcısı kimi burada oyuna çıxmaq necə hissdir?

- Gəncə mənə doğma şəhərdir. Rəqib qismində də olsa, bura gəlmək çox xoş idi. Gözəl futbol atmosferi var idi. Üzücü məqam məğlub olmağımız oldu. Ancaq yenə də möhtəşəm hissdir.

- Nihad Qurbanlı ilk qolda kobud səhvə yol verdi və qırmızı vərəqə aldı. Onu cəzalandıracaqsınız?

- Cəzalandırmaq asandır. Bizdə cəza metodu var. Mənə maraqlı odur ki, neçə oyundur ki, meydançanı 11 nəfərlə tərk edə bilmirik. Problem budur. Deməzdim ki, futbolçular qəsdən qırmızı vərəqə alırlar. Görünür, aqressiv oyunla kobud oyunu hələ ayıra bilmirlər. Bunları həmişə başa salsaq da, fərqləndirə bilmirlər. Bu qırmızı vərəqələr də oyunumuza təsir edir.

- Aqressiyanın dozası çox olur?

- Aqressivliyi tələb edirik, amma futbolda bunun dozasının aşağı və ya yuxarı olması yoxdur. Topla oynamaq lazımdır. Axırıncı foul kimi rəqibi yıxmaq Nihadın təcrübəsizliyindən qaynaqlandı.

- Nəticələriniz qənaətbəxş olmasa da, fəaliyyətinizi davam etdirirsiniz. Rəhbərliyin sizə qarşı inamının azldığını hiss etmirsiniz?

- Rəhbərliyin etimadını həmişə hiss edirik. Hərdən elə qələmə verirlər ki, sanki komanda çoxdandır bir yerdədir. Həm yerli, həm əcnəbi futbolçular, həm də mən özüm yeniyəm. Komanda yeni formalaşır. Rəhbərliyin dəstəyini hiss edirik və işimizi davam etdiririk. Mövsümün sonunda nəticəyə uyğun baxarıq. Amma sona qədər mübarizəni davam etdirəcəyik.

- Qarşıdakı matçların nəticələri ilə bağlı rəhbərlik sizə ultimatum verməyib?

- Xeyr, rəhbərlik tərəfindən heç bir xəbərdarlıq edilməyib. Bu o deməkdir ki, bizə etimadları var. Bu güvəni də doğrultmaq istəyirik.

- İstədiyiniz komandanı formalaşdırmaq üçün nə qədər zamana ehtiyacınız var?

- Müddəti demək çətindir. Futbolçulardan istəyimiz, bəlkə də, çoxdur. Hər halda düzəltməyə çalışacağıq. Uduzmağı xoşlamıram. Komandamızın yaxşı yerlərdə olmasını istəyirik.

- Emil Martinovla digər legionerlərin oyuna yanaşması, istəyi tam fərqli görünürdü. Bunu siz də hiss edirdiniz?

- Deməzdim ki, digər legionerlər həvəssiz idi. Oyuna yaxşı başlamışdıq. Kobud səhvdən buraxılan qol, ardından qırmızı vərəqə planlarımızı pozdu.

- Ruslan Hacıyev yenidən meydana çıxdı və yenə zədələndi. Onun problemi nədir?

- Fikir verirsinizsə, bəzi matçlarda futbolçuları öz mövqelərində oynatmırıq. Ağabala Ramazanov da zədəlidir. Onları əvəz edəcək oyunçu yoxdur. Ruslanı məcburiyyətdən meydana buraxdıq ki, hücumu gücləndirək. Amma yenə də ağrıları var. Çalışacağıq ki, tam sağaldaq, sonra oyuna buraxaq.