Ranqnik: "Azərbaycana uçub, rahat 3 xal qazanacağınızı düşünə bilməzsiniz"

"Gələn ilin martında Estoniya və Azərbaycanla oyunlarımız var. Hər iki komanda ilk dəfə final mərhələsinə vəsiqə qazanmaq istəyir. Odur ki, bu rəqiblərə yuxarıdan aşağı baxmaq olmaz".

Futbolxeber.az saytının məlumatına görə, bunu Avstriya millisinin baş məşqçisi Ralf Ranqnik 2024-cü il Avropa çempionatının seçmə mərhələsindəki rəqiblərini dəyərləndirərkən deyib.

Təcrübəli mütəxəssis qeyd edib ki, Azərbaycanla görüşdən asan qələbə gözləmir: "Azərbaycana uçub, rahat 3 xal qazanacağınızı düşünə bilməzsiniz. Heç bir oyun asan olmayacaq. Amma əsas məqsədimiz, istənilən halda, hər bir rəqibi məğlub edib final mərhələsinə birbaşa vəsiqə qazanmaq olacaq".

Qeyd edək ki, Azərbaycan millisi seçmə mərhələdəki ilk oyununu gələn il martın 24-də səfərdə Avstriyaya qarşı keçirəcək.