Mamadu Kane “Neftçi”yə qayıdır?

“Olimpiakos”un futbolçusu Mamadu Kane yayda Azərbaycana qayıda bilər.

Apasport.az-ın məlumatına görə, “Neftçi” 25 yaşlı dayaq yarımmüdafiəçisini yenidən heyətinə cəlb etməkdə maraqlıdır.

İddia olunur ki, ötən ilin yayında Yunanıstan klubuna transfer edilən və cari mövsümün ilk yarısını icarə əsasında “Neftçi”də keçirən Kane “Olimpiakos”da çox qalmayacaq. Pirey təmsilçisində özünü doğrulda bilməyən Qvineya millisinin üzvü baş məşqçi Pedro Martinsin gələcək planlarına daxil deyil. Bu üzdən “Olimpiakos” yayda onunla yollarını ayırmağı planlaşdırır.

Kanenin gedişinə könülsüz olsa da, transferindən qazanc əldə edən “Neftçi” isə onun hazırkı klubundakı durumunu diqqətlə izləyir. Azərbaycan çempionu Mamadunu Bakıya qaytarmağın yollarını axtarır.

Lakin klubdan Futbolxeber.az saytına verilən açıqlamada bildirilib ki, yayılan xəbər həqiqəti əks etdirmir. “Neftçi” dayaq yarımmüdafiəçisini yenidən heyətinə qatmağı düşünmür.