“Ədalət, onlar verdilər, bəs sən niyə götürdün?”

Haqqın olmayandan imtina etmək mədəniyyətdi. Təəssüf ki, elə bir dövrə gəlib çatmışıq ki, demək olar heç kim haqqı olmayandan imtina etmir, əksinə, daha artığını tələb edir. Kimsə düşünmür ki, mən buna layiq deyiləm, yaxud kiminsə yerini tuturam.  

İmtinasızlıq bu gün hər bir sahədə özünü büruzə verir - siyasətdə də, mədəniyyətdə də, futbolda da.

Bu söhbəti əksəriyyət eşidib. Bir gün müğənni Ədalət Şükürov rəhmətlik kaman ustası Habil Əliyevi görən ki, sevincək halda deyir ki, “Habil müəllim, məni təbrik edin, mənə Əməkdar artist adı verdilər”. Habil müəllim də həmişəki kimi hazırcavablığı ilə deyir: “Ədalət, onlar verdilər, bəs sən niyə götürdün?”

Bu cızma-qaranın da Ədaləti Bədavi Hüseynovdu. Uzun müddətdi zədə səbəbindən yaşıl meydandan kənarda qalan “Qarabağ”ın müdafiəçisi millinin Maltadakı toplanışına dəvət aldı və yenidən zədələndi. Dünəndən sosial şəbəkələrdə bu məsələ geniş müzakirə mövzusudur. Əksəriyyət baş verənlərə görə milli komandamızın baş məşqçisi Canni De Byazini tənqid edir. Bəli, italiyalı mütəxəssis Maltadan alınan məğlubiyyətə görə tənqid olunmalıdı. Onu tənqid etmək üçün kifayət qədər səbəb var. Amma Bədavi məsələsini də De Byazinin üzərinə yıxmaq bir qədər ədalətsizlikdi.

Az-çox futbolun içində olan istənilən adam təsdiqləyər ki, futbolçunun milliyə dəvət proseduru necədir. Uzun müddətli zədədən qayıdan futbolçuya heç kim dəvət dərhal göndərmir. Əvvəlcə həm onun klubundakı, həm millidəki həkimlərlə, eləcə də futbolçunun özü ilə vəziyyəti müzakirə edilir. Yalnız bundan sonra yekun qərar verilir. Böyük ehtimalla, Bədavinin durumu da istisna deyil və futbolçu da özünü yığmaya qoşulmağa hazır saydığı üçün heyətə cəlb olunub. Əks halda, heç kim heç kimi məcburən milliyə dəvət edə bilməz. Xüsusən də söhbət milliləşdirilmiş futbolçudan gedirsə. Deməli, bu məsələdə günahkar De Byazi yox, məhz Bədavi Hüseynovdu...

FUTBOLXEBER.AZ