Maksim Medvedev: "Bəzi futbolçular təzyiqləri qəbul edə bilmirlər"

"Malta ilə oyunda fərqli oyun sistemi ilə çıxış etdik. Bunları lövhədə göstərmək mümkündür, meydanda etmək isə çox çətindir. Çünki hər bir futbolçu həmin situasiyanı dərk etməlidir. Bəzi məqamlarda futbolçular tapşırıqları düzgün yerinə yetirməyəndə xaos yaranır. Heç kim belə olmasını istəmirdi".

Futbolxeber.az saytının məlumatına görə, bu sözləri milli komandamızın kapitanı Maksim Medvedev deyib. 

Latviya ilə yoxlama oyunundan öncə təşkil olunan mətbuat konfransına qatılan yığmamızın kapitanı Maltaya ilə matçda komandada anlaşmanın qaydasında olmadığını söyləyib: “İrlandiyaya qarşı daha yaxşı hücumlar qururduq. Malta onlardan səviyyəcə aşağı olsa da, biz ikinci nömrə kimi oynayırdıq. Uşaqlar bir-birini başa düşə, uyğunlaşa bilmirdilər. Bəzən meydanda xaos yaranırdı. Psixoloji və media tərəfdən üstümüzə hücumlar gəlir. Bəzi futbolçular sosial şəbəkələrə baxır, təzyiqləri qəbul edə bilmirlər. Rahat çıxsalar, Maltaya 2-3 qol vurarlar. Elə oyunlar olur ki, gah eniş, gah artım olur. 90 dəqiqəni eyni səviyyədə keçirmək lazımdır".