De Byazi: “Ümid edirəm ki, “Neftçi” növbəti mərhələyə yüksələcək”

Dünən “Neftçi”nin “Olimpiya” (Lyublyana) ilə yoldaşlıq oyununu (1:1) izləyən Azərbaycan millisinin baş məşqçisi Canni de Byazi “Neftçi TV”yə açıqlama verib.

Futbolxeber.az saytının məlumatına görə, italiyalı mütəxəssis “Neftçi”nin Çempionlar Liqasındakı şansları barədə danışıb:

“Buraya yaxın bir ərazidə qalıram. Yaşayıdığım ev buradan 200 km kənarda yerləşir. Əlbəttə ki, yaxınlıqda keçirilən hər bir yoldaşlıq oyununu izləməkdən məmnun olaram. Həm də yerli futbolçuların fiziki və texniki hazırlığına baxmaq istəyirəm. Çempion olmuş komandanın düşərgəsinə gəlmək və onun matçını izləmək mənim üçün böyük bir hissdir.

Çempionlar Liqasına gəlincə, əlbəttə ki, indidən proqnoz vermək çətindir. Çünki rəqibin hansı heyətlə meydana çıxacağını bilmirik. Amma ümid edirəm ki, “Neftçi” böyük əzmkarlıq göstərərək növbəti mərhələyə yüksələcək”.

De Byazi milliyə “Neftçi”dən az futbolçu cəlb olunması ilə bağlı sualı isə belə cavablandırıb: “Bu, “Neftçi”nin özündən də asılıdır. Çünki komandanın oyunlarında nə qədər çox yerli futbolçu iştirak etsə, mənim üçün yığmaya futbolçuları çağırmaq asan olacaq”.

Qeyd edək ki, "Neftçi"nin Çempionlar Liqasının 1-ci təsnifat mərhələsindəki rəqibi "Dinamo"dur (Tibilisi).