“Azərbaycan millisi Portuqaliya ilə matçda yaxşı oyun nümayiş etdirdi”

Qətər milli komandasının baş məşqçisi Feliks Sançez sabah Azərbaycan yığmasına qarşı keçirəcəkləri yoxlama oyunundan danışıb.

Futbolxeber.az saytının məlumatına görə, o, yığmamızın Portuqaliyaya qarşı yaxşı oynadığını bildirib: “Hər bir oyun bizim üçün əhəmiyyətlidir. Azərbaycan millisi Portuqaliya ilə matçda yaxşı oyun nümayiş etdirdi. Gənc və istedadlı futbolçulara malik olduqlarını bilirik. Xüsusən, fiziki cəhətdən daha yaxşı təsir bağışlayırlar. Ancaq hər oyunun ssenarisi eyni olmur”.

Sançez Azərbaycana qarşı hücum futbolu nümayiş etdirəcəklərini vurğulayıb: “Bizi çətin oyun gözləyir. Futbolçularımızı inkişaf etdirmək, yüksək səviyyəyə çatdırmaq üçün qrupda keçirəcəyimiz hər bir oyun bizə əlavə təcrübə qazandıracaq. Düşünürəm ki, ilk oyunda - Lüxsemburq yığması ilə görüşdə futbolçularım çox yaxşı oynadılar. Yenə müdafiədə diqqətli olmalı, daha çox hücum futbolu nümayiş etdirməliyik. Sabah keçirəcəyimiz oyuna tam hazırıq. Bu cür oyunlar heyətdə eksperiment aparmaq baxımından məşqçilər üçün də bir fürsətdir”.