Sabiq “Sumqayıt”lı: "Ailəm yanımda olsaydı, karyeramın sonunadək Azərbaycanda oynayardım"

“İsrailə qayıtdığım üçün peşman deyiləm. Qayıdışımın yeganə və əsas səbəbi ailəmdir”.

Futbolxeber.az saytının məlumatına görə, bu sözləri bir müddət əvvəl İsrailin “Makkabi” klubundan qalmaqalla ayrılan Azərbaycan milli komandasının və “Sumqayıt”ın sabiq futbolçusu Əli Babayev deyib.

30 yaşlı yarımmüdafiəçi Azərbaycan Premyer Liqasına qayıtmaq istədiyini bildirib: “Ailəm Azərbaycanda yanımda olsaydı, şübhəsiz ki, orada daha uzun illər və ya karyeramın sonuna kimi oynayardım, Çünki özümü çox yaxşı hiss edirdim. Ümumiyyətlə, karyeramda verdiyim qərarlar üçün peşman deyiləm.

Azərbaycana qayıtmağı düşünürəm? Ailəm buna hazır olsa və yanımda olsa, şübhəsiz ki, Azərbaycana qayıdaram. Əminəm ki, məni orada görməkdən çox məmnun olacaqlar. Hələ də Azərbaycandan olan hər kəslə ünsiyyətdəyəm, onları sevirəm və verdikləri hər şeyə görə çox minnətdaram”.

Qeyd edək ki, Babayev yığmamızla 1 matç keçirib. O, 2018/19-cu illər mövsümündə “Sumqayıt”da çıxış edib.