Limberski: "Qarabağ" ən çətin rəqibdir"

"Viktoriya" klubunun futbolçusu David Limberski Çexiya mətbuatına müsahibə verib. Futbolxeber.az saytının məlumatına görə, Limberski Çexiya millisindən getməsi və Çempionlar Liqasının III təsnifat mərhələsindəki rəqibləri "Qarabağ" haqda danışıb.

- Yığmadakı karyeranı başa vurmaq haqda qərarı nə zaman verdin?

- Yazdan etibarən bu barədə düşünürdüm. Hətta Avropa çempionatından öncə yığmadan getmək istəyirdim. Sonda Fransaya getməyə qərar verdim. Təssüflər olsun ki, turnir həm mənim, həm də yığmam üçün uğursuz oldu. Yığmadakı karyeram kədərli notlarla bitdi. Hərçənd daha layiqli şəkildə millidən getmək istəyirdim.

- Yəni Çexiya Avropa çempionatında uğur qazansaydı belə, yenə də yığmadakı karyeranı başa vuracaqdın...

- Bəli. Tezliklə 33 yaşım tamam olacaq. Qarşıdan dünya çempionatının seçmə mərhələsi gəlir. Bir neçə futbolçu yığmada getdi. Mən də düşündüm ki, artıq vaxtdır. Gücümü klub və milli komanda arasında bölmək istəmirəm.

- "Viktoriya"nın heyətində Çempionlar Liqasının qrup mərhələsində oynayan futbolçulardan birisən...

- Həmin vaxt bu uğura imza atacağımızı bilmirdik. Ancaq ola bilər ki, bir qədər məyus olduq. Çünki qrup mərhələsində uğurlu çıxış etmədik. Lakin indi məsuliyyətin nə qədər böyük olduğunu anlayırıq. Bu, mənim motivasiyamı bir qədər də artırır. Yenidən ÇL-in qrup mərhələsinə vəsiqə qazanmaq şansımız var. Bunu əldən verməməliyik.

- Bu həftə Çempionlar Liqasının III təsnifat mərhələsindəki rəqibiniz bilinəcək. Azərbaycan çempionu "Qarabağ" haqda nə deyə bilərsən?

- İki il öncə bu komanda ilə yoxlama görüşü keçirmişik. "Qarabağ" bu mərhələdə qarşılaşa biləcəyimiz ən çətin rəqiblərdən biridi.

- Cavab matçının keçiriləcəyi Bakıda öldürücü iqlim olacağı gözlənilir. 40 dərəcə hərarət və yüksək rütubət olacaq...

- Səfər və hava şəraiti bizim üçün əlverişli olmayacaq. Ancaq cütün taleyi meydanda həll olunacaq. Həmçinin şərtlər hər iki komanda üçün eyni olacaq. Cavab matçındakı istənilən vəziyyətə hazırıq.

Mənbə: qol.az