"İnter" təlim-məşq toplanışını davam etdirir

"İnter" Türkiyənin İzmit şəhərinin yaxınlığındakı Kartepe qəsəbəsində təlim-məşq toplanışını davam etdirir. Futbolxeber.az-ın məlumatına görə, toplanışın 3-cü günün ilk məşqinə saat 11.00-da start verilib. Yağış altında keçən məşq isinmə hərəkətlərdən və  müxtəlif məsafələrə qaçışdan ibarət olub. Axşam saat 17.00-da başlayan məşqdə isə futbolçular topla çalışıblar. Ötürmələr üzərində çalışan futbolçular, daha sonra şərti olaraq iki komandaya bölünərək meydanın yarı hissəsində futbol oynayıblar.

Qeyd edək ki, hazırlıq planına əsasən "İnter" bu gün də iki dəfə məşq edəcək.

Bu arada klubun prezidenti Georgi Nikolov dünən səhər saatlarında Türkiyəyə  gələrək, burada təlim-məşq toplanışı keçən komandanın düşərgəsinə baş çəkib. Klub rəhbəri futbolçu, məşqçi və texniki heyətlə görüşüb, onların qayğılarıyla maraqlanıb və komandanın hər bir üzvünə toplanışda uğurlar arzulayıb. Daha sonra Georgi Nikolov "İnter"in axşam məşqini izləyib.

Əlavə edək ki, "İnter"in ilk təlim-məşq toplanışı iyunun 11-də başa çatacaq.