Hafiz Məmmədov İspaniya Kralı ilə görüşüb

"Bakı" futbol klubunun prezidenti Hafiz Məmmədov İspaniya kubokunun  Madridin "Atletiko" və "Real" klubları arasında keçirilən finalı qarşılaşmasını izləmək məqsədi ilə İspaniyada səfərdə olub. Futbolxeber.az-ın məlumatına görə, səfər ərzində İspaniya kralı Əlahəzrət I Xuan Karlos, İspaniya xarici işlər naziri Xose Qarsiya Marqallo, baş nazirin müavini Soraya Saenz de Santamaria, Madird şəhərinin meri Ana Botella ilə görüşən Hafiz Məmmədov Azərbaycan Respublikasının prezidenti, dövlət başçısı cənab İlham Əliyevin ölkəmizin inkişafına və çiçəklənməsinə xidmət edən xarici və daxili siyasəti, Azərbaycanda aparılan quruculuq işləri, "Bakı" və "Atletiko" Madrid klubları arasında yaranan münasibətlər və qarşılıqlı faydalı əməkdaşlıqdan söhbət açmışdır.

İspaniya kralı Əlahəzrət I Xuan Karlos görülən işləri yüksək qiymətləndirərək, iki ölkə arasında yaranan dostluq münasibətlərindən məmnun qaldığını, bu əlaqələrin daha da möhkəmləndirilməsi üçün zəruri addımların atılacağını bildirib.

Görüş zamanı Hafiz Məmmədov Azərbaycan Respublikasının prezidenti cənab İlham Əliyevin Əlahəzrət I Xuan Karlosa ölkəmizə dəvətini çatdırıb, səfərin yaxın zamanlarda baş tutacağına ümidvar olduğunu bildirib.

İspaniya xarici işlər naziri Xose Qarsiya Marqallo ilə də görüşən Hafiz Məmmədov Azərbaycan iqtidarının dövlətlərimiz arasında münasibətlərin inkişafına böyük əhəmiyyət verdiyini, yaxın zamanlarda Azərbaycan Respublikasında İspaniya Krallığının Səfirliyinin açılmasını qərarı verildiyini bir daha təsdiqləyib, ölkəmizə səfər etməyi planlaşdırdığını və açılış mərasimində şəxsən iştirak etmək arzusunda olduğunu vurğulayıb. Eyni zamanda nazir qeyd edib ki, aprelin 29-30-da "Atletiko" (Madrid) klubunun Azərbaycana səfər zamanı müşayiət etmiş İspaniyanın nüfuzlu iş adamları bu prosesin səfirliyin tez bir zamanda açılmasını məqsədəuyğun sayaraq, Azərbaycanla iqtisadi əlaqələrə böyük önəm verdiklərini bildiriblər.

Öz növbəsində H.Məmmədov dövlətimizin İspaniya ilə əlaqələrin hərtərəfli genişləndirməsinə hazır olduğunu, qarşılıqlı yüksək səviyyəli səfərlərin münasibətlərimizin möhkəmləndirilməsinə mühüm təkan verə biləcəyini qeyd edib.

H.Məmmədov İspaniya Krallığının baş nazirinin müavini xanım Soraya Saenz de Santamaria, mədəniyyət və idman naziri Xose İqnasio Orteqa və turizm naziri Xose Manuel Lopezlə keçirdiyi görüşlərdə qarşılıqlı maraq kəsb edən məsələlər ətrafında fikir mübadiləsi aparıb.

Xatırladaq ki, mayın 18-də "Atletiko"nun İspaniya kubokunun finalındakı qələbəsi ilə bağlı Madrid şəhərinin mərkəzində tədbir təşkil olunub. Yüz minlərlə yaxın azarkeşin iştirak etdiyi tədbirdə "Atletiko" klubunun oyunçuları üzərində Azərbaycan Respublikasının bayrağı ilə bəzədilmiş avrobusla gəliblər. Səhnədə "land of fire Azerbaijan" adlı böyük banner quraşdırılıb.

Mərasim zamanı "Atletiko" klubunun futbolçuları və rəsmi nümayəndələri "Lənd of Azerbaijan"ın düşərli olduğunu, 14 ildən sonra "Real"ı məğlub edərək, 10-cu dəfə İspaniya kubokunun qazanılmasında dəstəyə görə Hafiz Məmmədova təşəkkürlərini ifadə ediblər. "Atletiko"nun türk futbolçusu Arda Turan ölkəmizə və xalqımıza olan hörmətini bir daha nümayiş etdirərərk azarkeşlər önünə Azərbaycan bayrağı ilə çıxıb.