Varea "Rəvan"ın ən yaxşısıdı

Mayın 18-dən başlayan "Rəvan"ın saytında başlayan sorğunun nəticələri artıq bəllidir. Futbolxeber.az-ın məlumatına görə, yenicə başa çatan 2012/13 mövsümündə "Rəvan”ın ən yaxşı futbolçusunun adına aydınlıq gəlib. Azarkeşlər və klub saytının istifadəçiləri arasında aparılan interaktiv sorğuda Xuan Manuel Varea qalib gəldi.

2 yerli və 3 legioner futbolçunun mübarizəsindən qalib ayrılan Vareanın uğuru tam gözlənilən idi. Axı argentinalı bombardir başa çatmış son mövsümdə vurduğu 14 qolla komandanın əsas "vuran ayağı”na çevrilib. Onun hesabında 3 məhsuldar ötürmənin olduğunu da qeyd edə bilərik.

Bir sözlə, mövsümboyu sərgilədiyi futbol ilə könülləri oxşayan argentinalı haqlı qalibiyyət əldə etdi. Varea respondentlərin yarısından çoxunun – 51,08 %-nin səsini qazanıb. O, ikinci pillədəki Mindauqas Kalonası (31,6 %) da xeyli qabaqlayır. Sıralamanın sonrakı ardıcıllığı isə belədir: 3. Şəhriyar Rəhimov – 8,23%; 4. Tofiq Mikayılov – 6,06%; 5. Miloş Adamoviç – 3,03%.