Dodo: “Növbəti oyunlarda Afinadakından da yaxşı oynayacağam”

Dodo: “Növbəti oyunlarda Afinadakından da yaxşı oynayacağam”

“Zədəm elə ciddi deyil. Qorxulu heç nə yoxdur”. Futbolxeber.az saytına müsahibəsində bu sözləri “Qəbələ”nin kapitanı Dodo deyib.

Braziliyalı futbolçu PAOK-a qalib gələ bilməmələrinin səbəbini belə açıqlayıb: “Futbolda elə olur ki, yaxşı oynayırsan, qələbə üçün hər şey edirsən. Amma qol vurmaq mümkün olmur. Bu gün də elə idi. 3 xal qazanmaq üçün çox çalışdıq. Sonda isə aktivimizə yalnız 1 xal yaza bildik”.

Dodo “Qəbələ”nin yeni hücumçusu Fakundo Pereyradan da söz açıb: “Pereyra çox yaxşı futbolçudur. Təxminən 2 həftədir komanda ilə birgə məşq edir. Bir müddət keçdikdən sonra o daha yaxşı formada olacaq”.

Qarşılaşmadan əvvəl o, “Sabah meydanda 150-200 faizlik Dodonu görəcəksiniz” vədini vermişdi. Bununla bağlı suala braziliyalı futbolçu elə sualla da cavab verib:  

- Sizə, meydanda neçə faizlik Dodo var idi?

- Məncə, 250.

- (gülür) Xoş sözlərə görə təşəkkür edirəm. Komanda yoldaşlarım kimi mən də qələbə üçün əlimdən gələni etdim. Növbəti oyunlarda Afinadakından da yaxşı oynayacağam.