“Qəbələ”dən Cavid Hüseynov açıqlaması

“Qəbələ” klubu Cavid Hüseynovun adının Avroliqanın qrup mərhələsində iştirak üçün UEFA-ya göndərilmiş siyahıya salınması ilə bağlı açıqlama yayıb. Futbolxeber.az klubun rəsmi feysbuk səhifəsində yer alan açıqlamanı olduğu kimi təqdim edir:

- "Qəbələ" İdman Klubu Cavid Hüseynovun adının Avropa Liqasının qrup mərhələsinin iştirak ərizəsinə salınmasıyla bağlı yaranan çoxsaylı suallara cavab olaraq bildirir ki, adıçəkilən futbolçumuz barəsində seçilən 3 aylıq həbs qətimkan tədbiri noyabrın əvvəlində başa çatır. Qrup oyunları isə dekabr ayının ortalarınadək davam edəcək. Əgər istintaq nəticəsində Cavid Hüseynovun günahsızlığı təsdiq edilsə və futbolçu azadlığa buraxılsa, o qrup oyunlarında iştirak etmək şansı qazanacaq. Məhz bu ehtimal nəzərə alınaraq Cavid Hüseynovun adı iştirak ərizəsinə salınıb.

Xatırladaq ki, Avropa Liqasının qrup mərhələsi üçün təqdim olunan iştirak ərizəsinə sonradan əlavələr etmək mümkün deyil.