Marius Pena: "Maddi baxımdan "Bakı" əla seçimdi"

"Bakı"nın rumıniyalı hücumçusu Marius Pena Prosport saytına müsahibə verib. Futbolxeber.az xəbər verir ki, təcrübəli futbolçu yeni kluna tez uyğunlaşdığını söyləyib: "Çox şadam ki, tez bir zamanda komandaya uyğunlaşa bildim. Bu işdə məşqçilər korpusu və komanda yoldaşlarım mənə yardımçı oldular. Halbuki mən komandaya qoşularkən hazırlıq prosesi artıq yekunlaşmaq üzrə idi. Burda komanda yoldaşlarım əsasən rus, ispan və ingilis dilində danışırlar. Mən özüm də bir qədər rus dilini bilirəm. Əgər, serb və ispan dillərini də öyrənsəm, əla olar. Amma yerli dili öyrənmək çox çətindi".

Pena Rumıniya və Azərbaycan futbolları arasındakı fərqlərdən də söz açıb: "Fərq çoxdu. Hazırda Rumıniya liqası daha güclüdür. Amma Azərbaycanda futbol daha sürətlə inkişaf edir. Burada futbola böyük pullar yatırılır və əminəm ki, gələcəkdə burada futbol daha da inkişaf edəcək".

"Styaua"ya mümkün transferi haqda isə Pena belə deyib: "Styaua"dan heç kim mənə təklif göndərmədi. Bildiyim qədəri ilə klub prezidenti məni heyətdə görmək istəsə də, baş məşqçi buna qarşı idi. "Bakı" ilə "Styaua" arasında seçim etməli olsam? Oyun baxımından "Styaua", maddi baxımdan "Bakı" əla seçimdi".