“İnter”in prezidentinin Azərbaycandan çıxmasına qadağa qoyulub?

“İnter”in prezidenti Georgi Nikolovun Azərbaycandan çıxışına qadağa qoyulduğu barədə xəbərlər yayılıb. Məlumatda deyilir ki, bu, “İnter”ə sponsorluq edən Beynəlxalq Bankla bağlı araşdırmalara görədir. Georgi Nikolovun Avroliqanın birinci təsnifat mərhələsinin ilk oyunu çərçivəsində səfərdə “Laçi”yə qarşı baş tutan matça yollana bilməməsi də bununla bağlıdır. Belə ki, Nikolov komanda ilə birgə səfərə getmək istəsə də, hava limanından geri qaytarılıb.

Yayılan məlumatlarla bağlı “İnter”in mətbuat xidmətinin rəhbəri Səbuhi Məmmədov Futbolxeber.az saytına bunları deyib: “Yayılan xəbərlər həqiqəti əks etdirmir. Nikolov heç Albaniyaya getmək fikrində olmayıb. Hazırda “İnter”dəki sıxıntılar hər kəsə məlumdur. Ona görə də Georgi Nikolov Albaniyaya getməkdənsə, Bakıda qalaraq klubun gələcək taleyi ilə bağlı məsələləri həll etməyə üstünlük verib”.