Ticani "Bakı"ya qayıdır?

Xəbər verdiyimiz kimi, bu gün "Bakı" Futbol Klubunun bazasında Novruz şənliyi keçirilib. Şənlikdən hazırlanan və klubun rəsmi saytında yerləşdirilən fotoreportaja baxarkən bir məqam diqqətimizi çəkdi. Belə ki, "Bakı"nın sabiq hücumçusu Əhməd Ticani də tədbir iştirakçıları arasında idi. Maraqlıdır, təxminən 3 il əvvəl "Bakı"nı tərk edən Ticaninin tədbirdə iştirakı hansı məqsəd daşıyırdı? Yoxsa, o yenidən komandaya qayıdır? Bu suallara aydınlıq gətirmək üçün "Bakı"nın Media və Marketinq Departamentinin rəhbəri Nəriman Mehdiyevə müraciət etdik. Nəriman bəy Futbolxeber.az-a verdiyi açıqlamada məsələyə belə münasibət bildirdi: "Ticani tədbirdə sırf qonaq kimi iştirak edirdi, Bayram tədbirimizə dəvət almışdı. Onun komandamıza qayıtması gündəmdə deyil".