“Nəticə həmişə önəmlidi”

Sabah yoxlama oyununda milli komandamızla qarşılaşacaq Özbəkistan millisinin yığmasının baş məşqçisi Mircəlal Qasımov bu gün Bakıda oyunöncəsi mətbuat konfransı keçirib. Futbolxeber.az-ın Azerisport.az-a istinadən verdiyi məlumata görə, Qasımov əvvəlcə qarşıdakı oyunla bağlı danışıb:   

- Bu, hazırlıq baxımından həm Azərbaycan, həm də bizim üçün çox faydalı oyundu. Siz AÇ-2016-nın seçmə mərhələsinə, biz isə Asiya oyunlarına hazırlaşırıq. Sabahkı matçda ehtiyat qüvvəmizi sınaqdan keçirməyə çalışacağıq.

- "Neftçi" və "Qarabağ"ın futbolçularının Azərbaycan yığmasına dəvət olunmaması sizin üçün üstünlükdü?

- Komandanızın öz planları var, bizim isə fərqli. Bilirəm ki, "Qarabağ"la "Neftçi"ni bu həftə Avropa Liqasında oyunlar gözləyir.

- Yığmamızın AÇ-2016-nın seçmə mərhələsindəki rəqiblərini necə dəyərləndirərdiz?

- Düzünü desəm, Azərbaycan yığmasına qrupunda çox çətin olacaq. Kifayət qədər yaxşı komandaların cəmləşdiyi qrupdu.

- Azərbaycanlı futbolçulardan kimlərləsə tanışsız?

- Bəli, Nazim Süleymanovla, Arif Əsədovla birgə oynamışam. Nazim sadəcə, möhtəşəm oyunçu idi. Azərbaycanlılar həmişə seçiliblər.

- Azərbaycan yığmasını Asiyadakı rəqiblərinizdən kiminləsə müqayisə edə bilərsiz?

- Belə bir müqayisə aparmaq çətindi. Komandanızın ABŞ-la yoxlama oyununa baxmışam. "4" və "7" nömrələrin (Mahir Şükürovla Vaqif Cavadovu nəzərdə tutur - red.) çıxışından xoşum gəlib.

- Nəticə sizin üçün önəmlidi?

- Nəticə həmişə önəmlidi.

- Ehtiyat qüvvəni sınayacaqsız, yoxsa əsas heyəti meydana buraxacaqsız?

- 20 futbolçu gətirmişəm. Hamısı hazırdı. Əsas heyətimiz bəllidi. Bütün futbolçuları sınamaq istəyirəm. Bizim hələ İordaniya və Yeni Zelandiya ilə də oyunlarımız var.

- Bahodir Nasimov niyə heyətdə yoxdu?

- Biz Asiya oyunlarına hazırlaşırıq. Bahodirin isə oyun təcrübəsi yoxdu. Onun hazırda heç klubu da yoxdu. İndi bizimlə olmasa da, yığmanın futbolçusudu.

- Azərbaycan Asiyada çıxış etsəydi, nəyə ümid edə bilərdi?

- Yaxşı təsir bağışlayardı. Prinsipcə, gördüyüm oyunlarına görə, bu komanda yüksək yerlər uğrunda mübarizə apara bilərdi. Sentyabrda seçmə mərhələ oyunlarınız başlayacaq. Həmin oyunlarda sizə uğurlar arzulayıram. Ümid edirəm ki, komandanız final mərhələsinə vəsiqə qazanar.