“Xəzər Lənkəran”: “Neftçi”yə qarşı 2 oyun və 4 xal

Bu həftə də "Xəzər Lənkəran"ın müxtəlif yaş qrupu komandaları müvafiq liqalarda oyunlar keçiriblər. Futbolxeber.az-ın klubun rəsmi internet saytına istinadən verdiyi məlumata görə, bazar ertəsi U-17 Liqasının XIX turunda "Xəzər Lənkəran" evdə AZAL-ı 3:0 hesabı ilə məğlub edib. Qollara Fazil Hüseynli, Heydər Babayev və Eduard Rəfiyev imza atıblar.

Növbəti gün isə “Xəzər Lənkəran”ın ən uğurlu qrupu olan U-15 komandası Final mərhələsinin 4-cü turunda "Neftçi"ni qəbul edib. Fasiləyə 0:1 geridə yollanan Ağadadaş Həmidovun yetirmələri ikinci hissədə Kamal Dənziyevin vurduğu iki qol sayəsində rəqibinin məğlub edərək Final mərhələsində ilk qələbəsini əldə edib - 2:1.

Dünən U-19 Liqasında "Bakı" səfərinə yollanan “Xəzər Lənkəran” böyükhesabla məğlub olub - 5:1.

Namiq Qarayevin başçılıq etdiyi U-16 komandası isə paytaxtda "Neftçi"nin qonağı olub. Meydan sahibləri oyunda hesabı açsa da, Eltac Mirzəyev dəqiq baş zərbəsi ilə hesabı bərabərləşdirib - 1:1.