Azarkeşlər braziliyalı futbolçunu döyüblər

“Korintians”ın yarımmüdafiəçisi Luan azarkeşlər tərəfindən döyülüb.

Futbolxeber.az saytının ESPN-ə istinadən verdiyi məlumata görə, insident San-Pauludakı motellərdən birində baş verib. Futbolçudan başqa, hadisə yerində daha 10 nəfər olub.

Hələlik futbolçuya hücumun səbəbləri məlum deyil. Hazırda hüquq-mühafizə orqanları insidenti araşdırırlar. Hadisənin görüntüləri polislər tərəfindən incələnir.

İlkin məlumatlara görə, futbolçuya hücum edənlər 6 nəfər olub. Onlardan biri “Korintians”ın azarkeş qrupunun rəhbəri Danilo Oliveyra olub. Dava-dalaş zamanı o və dostları futbolçudan klubu tərk etməsini istəyiblər.

Bildirilir ki, futbolçu polisə şikayət ərizəsi ilə müraciət etməyib. “Korintians” isə yaydığı açıqlamada futbolçuya lazımi köməyin göstəriləcəyini bəyan edib. Eləcə də fanatların hərəkəti tənqid edilib.

Qeyd edək ki, Luan 2020-ci ildən “Korintians”da çıxış edir. “Qremio”dan 5 milyon avroya transfer olunan 30 yaşlı futbolçu hazırkı klubunda keçirdiyi 78 matçda 9 qol vurub, 5 məhsuldar ötürmə verib.