Salahdan qələbə şərhi: “Bu, hələ başlanğıcdı”

“Liverpul”un hücumçusu Məhəmməd Salah İngiltərə Premyer Liqasının 23-cü turunda “Everton” üzərində qazanılan 2:0 hesablı qələbəni şərh edib.

Futbolxeber.az saytının xarici KİV-ə istinadən verdiyi məlumata görə, misirli futbolçu komandasının derbidə inamlı təsir bağışladığını bildirib:

“Bizim üçün vacib qələbə idi. Düşünürəm ki, həftə ərzində çox yaxşı hazırlıq keçdik. Nəticəsini də meydanda gördük. Ümid edirəm ki, bu, hələ başlanğıcdı. Cordan Henderson və Ceyms Milner deyirdilər ki, biz öz futbolumuzu sərgiləməliyik. Çox yaxşı oynadıq. Məncə, əvvəlki “Liverpul”u xatırlatdıq”.

Qeyd edək ki, Liverpul derbisindəki qələbə sayəsində xallarının sayını 32-yə çatdıran “Qırmızılar” turnir cədvəlində 9-cu pillədə qərarlaşıb.