Azərbaycanı Avropa çempionatında 19 cüdoçu təmsil edəcək

Azərbaycan Şimali Makedoniyanın paytaxtı Skopyedə keçiriləcək cüdo üzrə yeniyetmələr arasında Avropa çempionatında 14 çəki dərəcəsində 19 idmançı (10 oğlan, 9 qız) ilə təmsil olunacaq.

Futbolxeber.az saytının məlumatına görə, yığma turnirin son günündə qarışıq komanda yarışında mübarizə aparacaq.

Cüdoçulara yeniyetmə oğlanlardan ibarət yığmanın baş məşqçisi Emin İskəndərov, məşqçilər Nicat Şıxəlizadə ilə Kotaro Sasaki, yeniyetmə qızlardan ibarət yığmanın baş məşqçisi Elnur İsmayılov, məşqçi Əmrah Əhmədov rəhbərlik edəcəklər.

Oğlanların mübarizəsinə Anar Quliyev, İbrahim Talıbov (hər ikisi 50 kq), Rəsul Əlizadə, Məhəmmədəli Hüsiyev (hər ikisi 55 kq), Zeyd Ələsgərov (60 kq), Əli Hümbətov (66 kq), Səid Şərifov, Ayxan Həsənli (hər ikisi 73 kq), Səid Hüseynov (90 kq) və Tunar Fərzəliyev (+90 kq) qatılacaqlar.

Qızların yarışında isə Mədinə Hüseynova (40 kq), Gülşən Hüseynova (44 kq), Nərmin Ağamirzəzadə, Leyla Ələkbərova (hər ikisi 48 kq), Aysun Məmmədova, Nuranə Hacızadə (hər ikisi 52 kq), Səmayə Yusifli (57 kq), Ayan Əliyeva (63 kq) və Məsumə Məmmədli (70 kq) fəxri kürsüdə yer almağa çalışacaqlar.

Abdullah Rəhmətov (81 kq) yalnız komanda yarışlarında tatami üzərinə çıxacaq.

Qitə birinciliyində Azərbaycan Cüdo Federasiyasının hakimlər heyətinin üzvü, A kateqoriyalı beynəlxalq dərəcəli referi Akif Tahirov ədaləti qoruyacaq.