Cenklə Avropa “cənginə”

Bilmirəm təsadüfdür, ya zərurət, amma “Neftçi”nin avrokuboklarla vidalaşmasında da, Avropa səhnəsinə qayıtmasında da Cenk Sümerin imzası var. “Neftçi” sonuncu dəfə 2023-cü ildə avrokuboklarda çıxış edib. Flaqman həmin vaxt UEFA Konfrans Liqasının üçüncü təsnifat mərhələsində “Beşiktaş”a uduzaraq (1:3; 1:2) mübarizəni dayandırıb ki, Cenk Sümer də həmin vaxt İstanbul klubunda çalışırdı. Təxminən 1 il sonra “Beşiktaş”la yollarını ayıran funksioner 2024-cü ilin 25 iyununda “Neftçi” ilə rəsmi müqavilə imzaladı.

Sümerin təyinatı heç də birmənalı qarşılanmamışdı. Çünki buna qədər ortada Yens Andersson nümunəsi var idi. “Neftçi”nin idman direktoru postunu tutan isveçli klubda çalışdığı müddətdə futbol funksionerindən daha çox özünü mühəndis kimi təqdim etmişdi. Bu səbəbdən də Sümerin fəaliyyətinin necə alınacağı maraq doğururdu.

İndi, təxminən iki ildən sonra demək olar ki, Cenk Sümerin təyinatı özünü doğrultdu. Təbii ki, bu gün “Neftçi”nin yenidən avrokuboklara vəsiqə qazanmasında baş məşqçi Yuri Vernidubun rolu, zəhməti danılmazdır. Ukraynalı mütəxəssis Samir Abasovun bərbad vəziyyətə saldığı komandanı ayağa qaldıra bildi və yekunda “ağ-qaralar” UEFA Konfrans Liqasına vəsiqə qazandı. Lakin bəlkə də çox adam bilmir ki, Vernidub “Neftçi”nin şərtləri ilə razılaşmasaydı, heyətin yenilənməsini istəsəydi, onun təyinatı baş tutmayacaqdı. “Neftçi” rəhbərliyi yığılan heyətə, kollektivin gücünə, hazırkı futboçuların nəticə qazanmaq üçün kifayət edəcəyinə inanırdı. Elə də oldu. Zaman klub rəhbərliyinin seçiminin doğruluğunu sübut etdi. Bəli, Vernidub əla iş gördü. Amma klub rəhbərliyinin də zəhmətini unutmaq olmaz. Mövsüm boyu Cenk Sümer də bəzən tənqid hədəfinə çevrilirdi. Gah edilən transferlərə görə, gah da lazımi anlarda məsuliyyəti üzərinə götürməməsinə görə. Hətta bəzən sabiq “Neftçi” rəsmiləri arasında birbaşa da olmasa, dolayısı ilə ona söz atanlar da olurdu. Əslində, bu ittihamların əksəri haqsız idi. Ən azından stadionlarda olanlar nəyin necə olduğunu görürdü. Sümerin Şamaxıda hakimlərin qərəzli qərarlarına necə etiraz etdiyini, media önünə çıxaraq sözünü dediyini həmin gün stadionda olanlar da təsdiqləyər...

Bəlkə də başqası olsaydı, Samir Abasov gedəndən sonra komandanı yox, cibini düşünərək “Neftçi”yə Türkiyədən məşqçi gətirərdi. Lakin Sümer özünü yox, klubun mənafeyini seçdi. Nəticəsi də ortadadır.

“Neftçi” kimi klubda baş icraçı direktor postunu tutmaq heç də asan deyil. Lakin görünən odur ki, türkiyəli funksioner geridə qalan müddətdə işinin öhdəsindən gəlməyi bacarıb. Cenk Sümerlə müsahibələrdə dəfələrlə iştirak etmiş biri kimi deyə bilərəm ki, bugünkü nəticə minimum hədəfdir. “Neftçi” kimi, Cenk bəyin də iddiaları böyükdür.

Heyətdən söz düşmüşkən, “Neftçi”nin hər uğursuz oyunundan sonra tənqid olunanlardan biri də idman müşaviri Kamil Məmmədov idi. Samir Abasovun dönəmində bəziləri edilən transferlərə ağız büzürdülər. Halbuki yayda çətin vəziyyətdə olan klubda yenidən heyət qurmaq, ən azı bu prosesdə iştirak edənlərdən biri olmaq heç də asan deyildi. Lakin zaman göstərdi ki, Məmmədovun seleksiyası kifayət qədər uğurludur. Mövsümün əvvəlində xeyli tənqid olunan Freddi Varqas, İmad Faraj kimi legionerlər bu gün “Neftçi”nin aparıcı üzvləridirsə, deməli, görülən iş nəticəsini verib. Uzun sözün qısası, “Neftçi”nin mövsümün ikinci hissəsində qazandığı nəticələrdə, yenidən avrokuboklara yollanmasında məşqçilər korpusu, futbolçular kimi, rəhbərliyin də böyük rolu var. Lakin bununla kifayətlənmək olmaz. “Neftçi” bu uğurun ardını həm Avropada, həm də növbəti mövsüm ölkə çempionatında gətirməlidir. Azarkeşlərin də ümidi böyükdür. İnam var ki, 80 illikdə qazanılmayan uğurlar 90 illikdə qazanılacaq...

İBRAHİM