Qurban Qurbanovdan qələbə şərhi

"Futbolçularımı təbrik edirəm. Yaxşı oyun göstərdilər və vacib üç xal qazandıq. Hər iki komandanın azarkeşlərinə təşəkkür edirəm".

Futbolxeber.az saytının məlumatına görə, bu sözləri "Qarabağ"ın baş məşqçisi Qurban Qurbanov Azərbaycan Premyer Liqasının 29-cu turunun "Neftçi"(1:5) ilə oyunundan sonra keçirilmiş mətbuat konfransında deyib.

O, jurnalistlərin suallarını da cavablandırıb.

- Start heyətini müəyyənləşdirmək üçün hansı detallar vacib oldu?

- Futbolçuların hazırlığına görə bu addımı atdım. Bəzi rotasiyalar etdim. Futbolçular sıx qrafikdə oynayırdılar. Bəzi oyunçuların yorğunçuluğu çox idi. Ona görə rotasiyalar etdik. Futbolçular yaxşı məşq edirdilər, hazırlaşırdılar. Özlərini yaxşı tərəfdən göstərmək istəyirdilər.

- Həmişə deyirsiniz ki, "Neftçi" ilə oyun tamam başqadır. Son günlərin gərginliyi fonunda komandanı bu matça hazırlaşdırmaq əlavə güc tələb edir?

- Hazırlaşmağa bir o qədər vaxtımız da olmadı. Komanda şəklində bir məşqimiz oldu. "Neftçi"yə qarşı oynayırıqsa, futbolçulara çox motivasiya vermək lazım olmur. Bu oyunları oynamaq xoşdur. Azarkeşlər üçün də yaxşı oyun alınır. Vacib olan bundan sonrakı görüşdür. Komandanı ona düzgün hazırlaşdırmağa çalışacağıq. Böyükhesablı qələbə futbolçulara rahatlıq verə bilər. Bu oyuna hazırlamaq daha çətin olacaq.