Sevincin hipertrofiyası

Milli komandamızı “FİFA Series” turnirinin qalibi olması münasibətilə təbrik edirəm. Hesab edirəm ki, bu turnir təcrübə, özünəinam, anlaşma və taktiki-texniki bacarıqlar baxımından həm futbolçular, həm də məşqçilər üçün faydalı oldu. Qazanılan mükafat da qəpiyinə qədər halal xoşlarıdır – müasir futbolda heç kim havayı iş görmür.

azıya bu cür başlamağım təsadüfi deyil – məqsədim kiminsə ağlına yanlış fikir gəlməsinin qarşısını almaqdır. Yəni nə qələbəni kiçiltmək, nə də süni şəkildə böyütmək fikrim var. Lakin AFFA-nın baş katibi Cahangir Fərəcullayevin oyundan dərhal sonra verdiyi açıqlama uğurlu alınmadı. Ümumiyyətlə, o, ana dilində fikirlərini ifadə etməkdə çətinlik çəkir. Əks halda, oyun bitər-bitməz qələbənin kiçildilə biləcəyi ilə bağlı açıqlama verməzdi. Çünki həmin anda ictimai reaksiyanın necə olacağı hələ bəlli deyildi. Hörmətli Cahangir müəllim, sizin heç kimə göstəriş vermək səlahiyyətiniz yoxdur. Qələbəni kiçildən də olacaq, sizin kimi dostlarının təsiri ilə onu şişirdən də. Hansı saytın nə yazdığını, sosial şəbəkələrdə kimin hansı məqsədlə paylaşım etdiyini insanlar çox yaxşı görür. Bu gün heç kim “mağarada yaşamır” – hamının dünyagörüşü və təhsili var. Məsələn, sizinlə yaxın olan bəzi media resursları və sosial şəbəkə hesabları bu qələbəni davamlı şəkildə şişirtməyə çalışır. Halbuki “FIFA Series” turniri yalnız Azərbaycanda keçirilmir. Eyni gündə Bolqarıstan, Özbəkistan və digər milli komandalar da bu turnirin qalibi olublar. Araşdırın, görün həmin ölkələrdə bu uğura münasibət necədir – süni şişirtmə varmı? İnanın, belə ucuz yanaşmalar heç kimin ağlına gəlmir; insanlar daha ciddi işlərlə məşğuldur. Əslində sizi tam qınamıram. Futbolda yenisiniz, təcrübəniz yetərli deyil. Ola bilər ki, heç vaxt futbol oynamamısınız və bu sahənin emosional tərəfini yeni hiss edirsiniz. Buna görə də bir anlıq eyforiyaya qapılmısınız. Amma insanlara məsləhət vermək və reallıqdan uzaq açıqlamalar səsləndirmək düzgün deyil.

Sizin əsas vəzifəniz fərqlidir: heç olmasa millini təhvil aldığınız səviyyədən – C liqasından – yuxarı qaldırmaq, strategiyada yazılanları real şəkildə həyata keçirməkdir. Bunun üçün çox işləmək, fasiləsiz fəaliyyət göstərmək lazımdır. Biz deyilənlərə yox, görülən işlərə baxacağıq. Nağıllara artıq heç kim inanmır – çünki bu cür vədləri əvvəllər də çox eşitmişik. Unutmayın, bu milli komanda sizin deyil – hamımızındır. Və əmin olun ki, hamı onun uğurlu olmasını sizdən az istəmir. Sadəcə, hər kəs sizin kimi düşünmək məcburiyyətində deyil. Fərqli düşünənlər düşmən deyil. Onlara təzyiq göstərmək yox, hörmətlə yanaşmaq lazımdır. Çünki hər kəsin etik çərçivədə fikrini bildirmək hüququ var. Sizin vəzifəniz insanları susdurmaq deyil, futbolu inkişaf etdirməkdir. Məsələn, kiminsə sosial şəbəkədə etdiyi paylaşımı sildirmək qəhrəmanlıq deyil. Əksinə, tənqidlərə açıq olmaq və onlardan nəticə çıxarmaq inkişafın əsas şərtidir.

Bir sözlə, “elin gözü tərəzidir”. Böyük qələbə qazandığınız zaman bunu siz də aydın görəcəksiniz. O zaman cəmiyyətin bütün təbəqələrindən müsbət reaksiya görəcəksiz.

Kubokdan da muğayat olun, birdən dartıb qulpunu qopararsınız...

P.S. Hipertrofiya – orqan və ya toxumanın hüceyrələrinin ölçüsünün böyüməsi nəticəsində ümumi ölçüsünün artmasıdır.

TAĞI