Sevinməyin adamına görə dəyişməkliyi

Aparıcı Tural Əsədovun “Xəzər TV”də yayımlanan “Bakı gündəliyi” adlı verilişi var. Bakını sevənlərin maraqla izlədiyi proqramın növbəti buraxılışlarının birində Əsədov kənd ağsaqqallı ilə söhbət edir. Söhbət zamanı ağsaqqal bir dialoq danışır. Sosial şəbəkələrdə də maraqla qarşılanan, xeyli paylaşılan videoda ağsaqqalın söhbət açdığı dialoq təxminən belədir:  

“Günlərin bir günü bir arvad ərinə deyir:  

- Ay kişi, məni çox istəyirsən?

- Hə, çox istəyirəm.

- Mənim xətrimə siqareti tərgidərsən?

- Hə, tərgidərəm.

- Ərağı necə?

- Ərağı da tərgidərəm.

- Maaşın hamısını evə gətirərsən?

- Hə, gətirərəm.

- Ay kişi, mənim xətrimə özünü öldürərsən?

- Əlbəttə öldürərəm. Belə yaşamaq mənim nəyimə lazımdır ki?”

Son iki gündə futbolumuzda yaşananları gördükcə həmin video yadıma düşür. Çünki millimizin Sumqayıtda təşkil olunan "FIFA Series – 2026"da qalib olması elə şişirdilib ki... Görən deyər yəqin İspaniya və Argentinanı məğlub etmişik. Halbuki millimiz birinci oyunda tarixində ilk dəfə Avropa ölkəsi ilə qarşılaşan Sent Lüsiyaya 6:1 hesabı ilə qalib gəldi. Əvvəlki cümlədə qeyd etdiyimiz fakt rəqibin səviyyəsindən xəbər verir. Sosial şəbəkələrdə azarkeşlərin də qeyd etdiyi kimi, rəqib konkret məhəllə komandası səviyyəsində idi. Finalda isə Syerra Leoneni penaltilərdə üstələdik. Matçdan sonra AFFA-nın baş katibi Cahangir Fərəcullayev açıqlamasında qeyd etdi ki, bu, millimiz üçün vacib nəticədir: “Hesab edirəm ki, bu qələbəni kiçiltmək lazım deyil”.

Baş katibin bu açıqlamasından sonra isə əksəriyyət sanki tərifnamə bəhsinə girib. Baş katib futbol adamı deyil, ilyarımdır bu postu tutur. Ola bilər, onun üçün Sent Lüsiya və Syerra Leonə üzərində qələbə tarixi uğurdur. Bəs futbol adamlarına nə olub? Həqiqətənmi dedikləriniz ürəyinizdən gələnlərdir? İnanan daşa dönsün. Bu tərifnamələrdən sadəcə AFFA rəhbərliyinə yarınmaq qoxusu gəlir. Bu silsilə tərifnamələrdə ən əttökən məqam isə Syerra Leonenin FİFA reytinqindən bizdən yuxarıda olmasının gözə soxulmasıdır. Bir adam da sual vermir ki, neçə pillə yuxarıda? 30-cu yerdədilər, ya 72-ci? Əslində isə hazırda Azərbaycan millisi FİFA reytinqində 125-ci, Syerra Leone isə 119-cu yeri tutur. Yəni millimizlə Syerra Leoneni reytinqdə cəmi 5 komanda ayırır.

Bugünkü tərifnamələrin sadəcə sabun köpüyü olduğunu düşünməyə əsas verən vacib məqam milliyə qarşı 3-4 il əvvəlki münasibətdir. Bu gün milli komandamıza tərif yağdıranların böyük hissəsi 2022-ci ildə De Byazinin vaxtında Belarus, Slovakiya (səfərdə), Qazaxıstan, Moldova (səfərdə) və Şimali Makedoniya (səfərdə) üzərində ardıcıl 5 qələbəyə ağız büzənlər, “mənasız qələbələrdir” deyənlərdir.

Sizcə, FİFA reytinqində 119-cu olan Syerra Leoneni öz meydanında penaltilərdə udmaq uğurdur, ya 48-ci olan Slovakiyanı səfərdə? Bəs 167-ci yerdəki Sent Lüsiyaya qalib gəlmək daha prestijlidir, ya 48-ci pillədə qərarlaşan Şimali Makedoniyaya? Hələ mən dünən DÇ-2026-ya vəsiqə qazanan İsveç yığmasını Bakıda 3:0 üstələməyimizi demirəm...

Necə olur, o qələbələr mənasız olur, Sent Lüsiya və Syerra Leone (penaltilərdə) üzərində qələbə isə az qala qəhrəmanlıq kimi təqdim edilir. Deməli, adamına görə "qələbəyə münasibət" də dəyişir. Həmin bakılı ağsaqqalın təbirincə desək, belə sevinmək mənim nəyimə lazımdır ki?..

İBRAHİM