Qurban Qurbanov: “Şans 50-50-yədir, amma istəyimiz çoxdur”

“Bir neçə gün yaxşı hazırlıq keçdik. Sadəcə rəqibi tam yaxından tanımırıq. Amma özümüz demək olar ki, istədiyimiz qaydada hazırlaşa bildik. Ümumi hazırlıq yaxşı səviyyədədir”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov sabah “Ferensvaroş”a qarşı keçiriləcək UEFA Çempionlar Liqasının pley-off mərhələsinin ilk oyunu barədə danışarkən deyib.

Hava limanında “CBC Sport”un suallarını cavablandıran mütəxəssis Macarıstan çempionunun tam fərqli komanda olduğunu bildirib: “Fərqli bir sistemdə oynayırlar. Çox fiziki güc sərf etməli olacağıq. Çünki rəqib hücuma həddindən artıq tez keçir və uzun toplardan çox istifadə edirlər. Eləcə də standart vəziyyətlərdən çox ciddi yararlanırlar. Hətta bir az da sərt oynayırlar. “Ferensvaroş” çox bərk komandadır. Bəlkə də bir az bizə uyğun olmayan rəqibdir. Hər top itkisindən sonra xeyli güc sərf etməli olacağıq. Hər bir halda buna da hazır olmalıyıq”.

O, futbolçularının bu cür matçlar üçün təcrübəsinin olduğunu vurğulayıb: “Bu tərzdə oynayan komandalara qarşı az görüş keçirməmişik. Ola bilər matçın başlanğıcında bir qədər çətinlik olsun. Amma ümid edirəm ki, dəqiqələr keçdikcə oyunu ələ almaq üçün daha düzgün düşünə biləcəyik”.

Q.Qurbanov şansları belə dəyərləndirib: “Şansımız var. Hər şansdan maksimum yararlanmaq istəyirik. Rəqib də bu düşüncədədir. Bu cür oyunlar bəlkə də bəzən baxımsız olur. Hər komanda nəticəyə oynamağı daha çox xoşlayır. Şansımız varsa, bundan istifadə etməyə çalışacağıq. Belə oyunlarda həmişə şansları 50-50-yə dəyərləndirirəm. Amma istəyimiz çoxdur”.