İsgəndər Cavadov akademiyası və “Dinamo” təhdid qarşısında

Azərbaycan futbolu növbəti rəzalətin astanasındadır.

Futbolxeber.az saytının məlumatına görə, 8 ildir fəaliyyət göstərən İsgəndər Cavadov Bakı Futbol Akademiyası və 3 ildir fəaliyyətini bərpa edən “Dinamo” Futbol Klubu təhdid olunub. Belə ki, iranlı iş adamı olduğu deyilən Rıza İbrahimi akademiya və klub rəhbərliyi ilə əlaqə saxlayaraq onlardan 8 ildir məskunlaşdıqları  Abşeron Olimpiya Kompleksini təcili tərk etməyi istəyib. O bildirib ki, İsgəndər Cavadov Bakı Futbol Akademiyası və “Dinamo” Futbol Klubu iyulun 21-nə kimi kompleksi tərk etməlidir. Əks halda onlar zorla Abşeron Olimpiya Kompleksindən uzaqlaşdırılacaqlar. İbrahimi iddia edib ki, idman qurğusunu 10 illik icarəyə götürüb və gələn həftədən orada yenidənqurma işlərinə başlayacaq.

Maraqlıdır, Rıza İbrahimi bu barədə kiminlə razılaşıb? İdman qurğusunun məxsus olduğu Gənclər və İdman Nazirliyi ilə? Əgər belə bir razılıq varsa, nəyə görə İsgəndər Cavadov Bakı Futbol Akademiyası və “Dinamo” Futbol Klubu bu barədə əvvəldən məlumatlandırılmayıb? Ümumiyyətlə, Rıza İbrahimi hansı əsasla Abşeron İdman Kompleksini 10 illiyə icarəyə götürür? İnternetdə bu şəxslə bağlı geniş məlumata rast gəlmədik. Tehran yaxınlığındakı Kərac şəhərindən olan, hansı biznes sahəsində fəaliyyət göstərdiyi bilinməyən, sadəcə iş adamı kimi təqdim edilən İbrahimi necə 300-dən çox azərbaycanlı uşağın futbolla məşğul olduğu kompleksi zəbt edə bilər? Göründüyü kimi, suallar çoxdur, cavablar isə yoxdur.

Digər tərəfdən İsgəndər Cavadov Bakı Futbol Akademiyası və “Dinamo” Futbol Klubu bu cür münasibətə layiqdirmi? İsgəndər Cavadov Azərbaycan futbolunun ən tanınmış simalarından biridir. Şöhrət ordenli Cavadovun adını daşıyan akademiya necə 3 günün içində 8 ildir məskunlaşdığı idman kompleksindən uzaqlaşdırıla bilər? “Dinamo”nun rəhbəri Yaşar Seyidov uzun illər Azərbaycan futbolunda rəhbər şəxslərdən olub. Onun idarə etdiyi “Bakı” Futbol Klubu uzun illər Azərbaycanın müxtəlif yaş qrupları üçün onlarla futbolçu yetişdirib. İndi də eyni missiyanı “Dinamo” davam etdirir.

Abşeron Olimpiya Kompleksi 8 ildir İsgəndər Cavadov akademiyasının istifadəsindədir və 10 yaş qrupu üzrə komanda gündəlik məşqləri burada keçirir. Ümid edirik ki, iranlı iş adamının istəyi baş tutmayacaq. Hazırda onsuz da akademiya, futbolçu baxımından əziyyət çəkən Azərbaycan futbolunda daha bir rəzalət yaşanmayacaq.