Kevin Medina: “Niyə də “Qarabağ”da qalmayım?”

“Komandamız yaxşı performans sərgilədi. Vacib qələbə qazandıq”.

Futbolxeber.az saytının məlumatına görə, bu sözləri “Qarabağ”ın müdafiəçisi Kevin Medina Azərbaycan Premyer Liqasının 31-ci turunda “Neftçi” üzərində qazanılan 3:0 hesablı qələbəni şərh edərkən deyib.

O, məqsədlərinin hər oyunda qalib gəlmək olduğunu bildirib: “Dayanmadan məşqlərdə çalışırıq. Hər oyunda qalib gəlmək istəyirik. Yaxşı çıxış etdiyimizi düşünürəm. Heç vaxt dayanmırıq. Çemponluğa yaxın olsaq da, sona qədər eyni tempdə mübarizə aparacağıq. Çünki hər matç bizim üçün vacibdir”.

Kolumbiyalı müdafiəçi hədəflərinin “qızıl dubl” etmək olduğunu vurğulayıb: “Qarşıda bizi kubok oyunu gözləyir. Çox çətin qarşılaşma keçəcək. “Araz-Naxçıvan” yaxşı komandadır. Bizim üçün vacib görüşdür. Qalib gəlib finala yüksəlmək istəyirik. Məqsədimiz ötən il olduğu kimi, “qızıl dubl” etməkdir. Bunun üçün əlimizdən gələni edəcəyik”.

Medina son oyunlarda ehtiyatda qalmasına belə münasibət bildirib: “Bu, baş məşqçinin qərarıdır. Mən də hörmətlə yanaşıram. Məşqlərdə əlimdən gələni edirəm. Futbol belədir. Bəzən oynayırsan, bəzən isə öz vaxtını gözləməli olursan”.

O, gələcək karyerası ilə bağlı suala cavabında “Qarabağ”da qalmaq istədiyini söyləyib: “Qarabağ”da xoşbətəm. Niyə də komandada qalmayım? Azərbaycan futboluna bələdəm. Burada məni hər şey qane edir”.